भांगरभूंय | प्रतिनिधी
भांगरभूंय । प्रतिनिधी
फोंडेंः गोंयांतल्यान सुमार 2500 लीटर सोरो घेवन हैदराबाद हांगा वचपी ट्रक रामनगर पुलिसांनी शुक्राराक फांतोडेर धरलो. बिस्किटांची येरादारी करपी ह्या ट्रकांतल्यान ल्हिपचोरयां व्हो सोरो व्हरताले. ट्रक ड्रायव्हर कटाबल्ली नागाचारी (तेलंगणा) हांका पुलिसांनी अटक केल्या. ट्रक आनी सोरो मेळून 52 लाख 50 हजारांचो मुद्देमाल पुलिसांनी जप्त केला.
गोंयांतल्यान हैदराबाद वचपी टीएस 05 यूई 8845 नंबराचो ट्रक शुक्राराक फांतोडेर रामनगर पुलिसांनी दुबाव आयिल्ल्यान आडयलो. ट्रकांत पार्ले कंपनीच्या बिस्किटांची बॉक्सां आसात अशें ड्रायव्हरान सांगलें. मात पुलिसांनी ट्रकाची तपासणी केली तेन्ना तातूंत सोऱ्याचीं 140 बॉक्सां मेळ्ळीं. जोयडा पुलीस स्टेशनाचो निरीक्षक नित्यानंद पंडित हाच्या मार्गदर्शना खाला रामनगर पुलीस स्टेशनाचो उपनिरीक्षक बसवराज माबनूर आनी तांच्या पुलीस पंगडान ट्रक जप्तीची कारवाय केली.
गोंयांतल्यान माल येरादारी करपी अवजड वाहनांतल्यान व्हडा प्रमाणात सोऱ्याची येरादारी करतात. हैदराबाद वचपी ट्रकांतल्यान सोरो व्हरतात अशी म्हायती रामनगर पुलिसांक मेळिल्ली. ताका लागून बिरेस्तारच्यान पुलीस तेळणी करताले. शुक्रारा फांतोडेर हे ट्रक तांकां दिसलो. कांय म्हयन्यां पयलीं अनमोड हांका कांय लाख रुपया मोलाचो सोरो जप्त केलो. ते उपरांत शुक्रारा पुलिसांनी केल्ली ही दुसरी व्हड कारवाय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
