गोंयच्या एका आगळ्या वेगळ्या लग्नाची काणी…

भांगरभूंय | प्रतिनिधी

पणजी, खास प्रतिनिधी ः गोंयांत पांच जानेवारीक दोन मध्यमवर्गीय कुटुंबांनी एक इतिहास घडयलो. समाजात एक वटेन विधवेक कुशीक करप, धर्मीक कामांनी तिका वांटेकार जावपाक दिवप ना अशें विचार आनी प्रथा समाजांत हे घटकेक पसून पाळटात. पूण ही एका लग्नाची आगळी वेगळी उर्बा दिवपी काणी. घोव मेलो म्हणून फाटीं सरनासतना एके विधवा आवयन आपले चलयेच्या लग्नाचें यजमानपण केलें. इतलेंच न्हय तर दोन बायलांनी ह्या सुवाळ्याचें पुरयतपण केलें. ह्या आगळ्या लग्नाची चर्चा सध्या गोंयांत चालू आसा.
हो सुवाळो वास्कोच्या बोगमाळोच्या दर्यादेगेर जालो. नामनेचो सतारवादक पं. योगराज नायक बोरकार हांका 52 व्या वर्सा कोरोनाक लागून मरण आयलें. गोंयचो नाटककार आनी समाजवादी विचारवंत किशोर बोरकार हांचो तो व्हडलो पूत. तांची घरकान्न उषा नायक रेडिओचेर ‘आरजे उषा’ ह्या नांवान लोकप्रीय. तांची धूव गौतमी वेवसायान पशुवैजकी दोतोर आसा. तिचें लग्न वास्कोच्या डॉ. प्रथमेश डिचोलकार हांचे कडेन थारलें. ताच्याय बापायक हालींच मरण आयल्लें. गौतमी आनी प्रथमेशाचें लग्न थारलें खरें, पूण गौतमीन एक अट घाली, म्हज्या लग्नांत यजमानपण आवयनच करुंक जाय, नाजाल्यार लग्न धर्मीक रितीन करचें न्हय.

आजयेन नातीक दिलो तेंको…

गौतमीच्या ह्या निर्णयाक तेंको दिलो तो ताचे आजयेन. तिच्या घोवाकय पिरायेच्या 49 व्या वर्सा मरण आयलें. उपरांत फाटलीं 33 वर्सां तिका जायत्या तरांच्या संकश्टांक तोंड दिवचें पडलां. तिणें आपले धुवेक आनी नातीक तेंको दिलो. गौतमीची एक सोयरी शीतल आरोलकार ही सुकुराची आदली सरपंच आनी सद्याची पंच. तिणेंय गौतमीच्या निर्णयाक तेंको दिलो.

आवय बगर कोणाकूच यजमानपण नाका…

बापूय आसतना आनी ताच्या मरणा उपरांत लेगीत म्हज्या आवयन म्हजे खातीर खूब कितें केलें. लग्न जावन सुखी जिवीत जगचें बरो संवसार जावचो अशें ती म्हणटाली. देखून तिचो हो हक्क हेरांक दिवपाची म्हाका इत्सा नाशिल्ली, अशें गौतमीन सांगलें.

हांवें सोंसलें, तें सुनेच्या वाट्याक नाका…

गौतमीची आजी श्यामलता नायक हिणें सांगलें, म्हज्या घोवाक मरण आयलें त्या वेळार विधवांक मान, सन्मान नाशिल्लो. धर्मीक, भौशीक कार्यावळींनी बायलो थोमणे मारताल्यो, कुशीक दवरताल्यो. सकाळीं विधवेचें तोंड पळोवचें न्हय अशें म्हण्टाले. आनीकूय खूब रिती आशिल्ल्यो. हो सगळो त्रास हांवें सहजपणान सोंसलो. तो त्रास म्हजे सुनेक जावचो न्हय म्हणून गौतमीच्या निर्णयाक हांवें तेंको दिलो. कांय जाणांनी म्हाका ह्या विशयाचेर विचारलें. तांचे कडेन झगडीं लेगीत जालीं. पूण ह्या निर्णयाचेर हांवें हार मानली ना.

लग्न लावपाक बायलांचो फुडाकार…

शमा पुणेकार आनी आनीक एक बायल गोंयाच्या भायल्यान हें लग्न लावपाक आयली. तांणी शास्त्रीय, धर्मीक पद्दतीन हें लग्न लायले तशेंच दर एका मंत्रा फाटलो आनी विधी फाटलो अर्थय सांगलो. आमी ज्ञानप्रबोधिनी संस्थे वरवीं मुंबय आनी पुण्यांत हिंदू धर्माचे 16 संस्कार सुवाळे करतात अशें ह्या बायलांनी सांगलें. अशें काम करपाक सुरवेक आमकां पुण्यांतल्या कांय लोकांच्या खर विरोधाक तोंड दिवचें पडलें, पूण आमी हार मानली ना. देखून आतां हो विरोध बरोच उणो जाला अशें दिसता, अशें ह्या बायलांनी सांगलें.

लग्न जाल्लें जोडपे म्हणटा…

आमी हें पावल उखलपाचें धाडस केलें. सगळ्यांनी तशेंच करचें. आमी शिकिल्ले आसात. देखून कोणाक दुखयनासतना अशें वागणुकेंत फाटीं उरचे न्हय अशें आवाहन डॉ. गौतमी आनी डॉ. प्रथमेश ह्या नवें लग्न जाल्ल्या जोडप्यांन केलां.