भांगरभूंय | प्रतिनिधी
रेल्वे सुरक्षा दळाची कामगिरी: तिगां कडल्यान कोल्ड्रींग्स सयत न्हिदेच्यो गुळयो जप्त
मडगांव: रेल्वे प्रवासांत प्रवाशां कडेन इश्टागत करून तांकां चॉकलेट, चिप्स आनी शितपेयांतल्यान गुंगीचें वखद दिवन बेशुध्द केले उपरांत लुटपी तिगां चोरांक मडगांव रेल्वे सुरक्षा दळाच्या पुलिसांनी ताब्यांत घेतल्यात. दुबावितां कडल्यान न्हिदेच्यो गुळयो आनी शितपेयाच्यो बाटल्यो जप्त केल्यात. फुडले कारवाये खातीर हें प्रकरण कोंकण रेल्वे पुलिसां कडेन दिलां.
वास्को हजरत निजामुद्दीन एक्स्प्रेस हे रेल्वे गाडयेंतल्यान प्रवास करपी मध्य प्रदेशांतल्या आठ प्रवाशां कडेन इश्टागत करून भामट्यांनी लुटिल्लें. ही घडणूक 11 सप्टेंबर दिसा घडिल्ली. उपरांत लेगीत असोच प्रकार 18 सप्टेंबर दिसाय घडिल्लो. त्या वेळार दोन प्रवाशांक गुंगीचें वखद दिवन लुटिल्लें. 11 सप्टेंबर दिसा घडिल्ले घडणुकेंत आठ प्रवाशांक शितपेयांतल्यान न्हिदेच्यो गुळयो दिवन तांचे कडले 25 हजार रुपया आनी सात मोबायलाची चोरी केल्ली. ह्या चोरी प्रकरणांत बेळगांव पुलीस स्टेशनार गुन्यांव नोंद केल्लो. उपरांत तें प्रकरण वास्को रेल्वे पुलिसां कडेन वर्ग केल्लें.
ह्या प्रकरणा उपरांत मुंबय सावनूय अशेच तरेची घडणूक घडिल्ली आशिल्ल्याचें आनी दोगां प्रवाशांक लुटिल्ल्याचें प्रकरण मुंबय रेल्वे पुलिसां कडल्यान मडगांव रेल्वे पुलिसां कडेन वर्ग केल्लें. उपरांत मडगांव रेल्वे सुरक्षा दळ आनी वास्को रेल्वे पुलिसांचो पंगड तपास करतालो.
चवकशे वेळार चोरांचें जें वर्णन प्रवाशांनी केल्लें ते प्रमाण विवीध रेल्वे स्टेशना वयल्या सीसीटीव्ही फुटेजीची तपासणी केल्ली. रेल्वे सुरक्षा दळाच्या पुलिसांनी साद्या भेसांत रेल्वेंतल्यान प्रवास करीत चोरांचो माग घेतिल्लो. उपरांत मेळिल्ल्या पुराव्यांच्या आदाराचेर मडगांव रेल्वे सुरक्षा दळाच्या पुलिसांनी मडगांव स्टेशना वयल्यान तिगां दुबावितांक ताब्यांत घेतले. हे तिगूय दुबावीत मूळ बिहार हांगासरले आसून सद्या फोंडें वाठारांत राबितो करताले.
रेल्वे सुरक्षा दळाचे पुलीस निरिक्षक विनोद मिश्रा हांणी दिल्ले म्हायती प्रमाण वास्को ते हजरत निजामुद्दीन एक्स्प्रेस गाडयेंत आठ प्रवाशांक लुटिल्ल्या प्रकरणांत मो. सरताज (29, रा. बुद्धी, काशिबरी अरिय्या, बिहार), चंदन कुमार (23, रा. जोकीहाट, बिहार) आनी दारा कुमार (29, रा. जोकीहाट, बिहार) हांकां मडगांव रेल्वे स्टेशना वयल्यान ताब्यांत घेतल्यात. तांचे चवकशे उपरांत फुडले कारवाये खातीर गोंय पुलिसांच्या ताब्यांत दिले.
प्रवाशांक बेशुद्ध करून लुट्टाले
मूळ बिहार राज्यांतले मो. सरताज, चंदन कुमार आनी दारा कुमार हे दुबावीत सद्या फोंडें वाठारांत राबित्याक आशिल्ले. तांचे कडल्यान न्हिदेच्यो गुळयो आनी गुंगीचें वखद मिक्स केल्लें कोल्ड्रींक जप्त केलां. प्रवाशां कडेन इश्टागत करून तांचो विस्वास मेळयले उपरांत ते तांकां खावपाक चॉकलेट, चिप्स आनी पियेवपाक कोल्ड्रींक्स दिताले. प्रवासी बेशुद्ध जाले उपरांत प्रवाशा कडलें सामान चोरून चोर फुडल्या स्टेशनार देंवताले आनी परतून येताले अशें चवकशे वेळार स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
