भांगरभूंय | प्रतिनिधी
दिवचल ः फाटल्या कांय दिसा सावन गांवकरवाडो – मुळगांवां सुणी, माजरां ना जायत आशिल्ल्यान कोणतरी रानवटी जनावरच तांका खाता असो अदमास गांवातल्या लोकांनी उक्तायल्लो. आतां, सीसीटिव्ही कॅमेऱ्यांत बिबटो सुण्यांचेर हल्लो करतना दिसलो तेन्ना लोकांचो अदमास खरो थारलो.
मजगतीं, मुळगांवां तळेश्वर देवळा लागसार नव्यान बांदिल्ल्या गौरेश परब हांच्या घरा फाटल्यान आशिल्ल्या स्टोर रूमांत न्हिदिल्ल्या सुण्याचेर मध्यान रातीं एका बिबट्यान हल्लो केलो. ह्या घरांच्या भायर सीसीटिव्ही कॅमेरा आशिल्ल्यान हे दृश्य कॅमेऱ्यांत कैद जालें. ह्या घराच्या फाटल्यान खण, रान आशिल्ल्यान गांवांत रानवटी जनावरां येवपाच्यो घडणुको खूबदा घडटात आनी आतां बिबट्यांक लागून लोक भियेल्यात. मजगतीं, हे विशीं रान खात्याक कळयलां आनी सुजल परब हांणी बिबट्याचो बेगीन बंदोबस्त करचो अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
