खात्यांच्या कामगिरीचो अहवाल आतां 3 म्हयन्यांनी

भांगरभूंय | प्रतिनिधी

-आतां मेरेन 23.3 टक्के अर्थसंकल्पांतल्या निधीचो वापर

पणजी : सगल्या खात्यांच्या कामगिरीचो अहवाल दरेकी तीन म्हयन्यांनी नवे पर्व ह्या नेमळ्यांनी प्रसिद्ध जातलो. आतां मेरेन 23.3 टक्के अर्थसंकल्पांतल्या निधीचो वापर जाला आनी 10 टक्के घोशणांची कार्यवाही जाल्या. हेर मंत्र्यांच्या सहकार्यान 100 टक्के अर्थसंकल्पाची कार्यवाही जातली, अशें आस्वासन मुख्यमंत्री डॉ. प्रमोद सावंत हांणी दिलें.

2023 – 2024 वर्साच्या अर्थसंकल्पा वयली चर्चा बिरेस्तारा सोंपली. मुख्यमंत्री डॉ. प्रमोद सावंत हांणी चर्चेक जाप दितना अर्थसंकल्पाच्या कार्यवाहीची म्हायती दिली.

2023 – 2024 वर्साचो अर्थसंंकल्प 26,844 कोटी रुपयांचो आसा. जुलय मेरेन 5,450 कोटी रुपया खर्च जाल्यात. हातूंत येवजणें सयत मुळाव्या सुविधां वयल्या खर्चाचो आस्पाव आसा. फाटल्या वर्सा 3,585 कोटीं मेरेन रीण घेवपाची मेकळीक आशिल्ली. सरकारान फक्त 1,850 कोटी मेरेन रीण घेतलां. रीण घेवपाच्या मर्यादे परस चड रीण सरकारान घेवंक ना. 2023 – 2024 वर्सा 4,883 कोटी रुपया मेरेन रीण घेवपाची मर्यादा आसा. आतां मेरेन सरकारान 630 कोटी रुपयांचें रीण घेतलां.

हें सरकार इव्हेंट मॅनेजमेंट सरकार आशिल्ल्याची टिका विरोधकांनी केल्या. सरकार काम करता म्हूण

इव्हेंट करतात. कामां तशेंच येवजण्यो लोकां मेरेन पावोवपा खातीर इव्हेंट करपाची गरज आसा. डबल इंजीन सरकाराक लागून मोपा विमानतळ, मांडवी न्हंये वयलो तिसरो पूल, जुवारी पूल, आयुष हॉस्पिटल हे प्रकल्प जावपाक पावले, अशें मुख्यमंत्र्यांनी सांगलेें.

डंप म्हालाची जातली पावणी

खणी सुरू करपा खातीर आतां मेरेन 9 ब्लॉकांची पावणी जाल्या. गरजेचे परवाने घेवन खणी सुरू करपाक कंपनींक सांगलां. आतां म्हयन्या भितरर खण डंप धोरण तयार जातलें. डंप म्हालाची पावणी जातली. हाका लागून येत्या हंगामात खण वेवसाय सुरू जातलो.

भायल्या वाहनां खातीर हरीत सेस

राज्या भायल्यान जी वाहनां गोंयांत येतात, तांकां हरीत सेस लागू जातलो. हरीत सेसांतल्यान जमा जावपी निधीचो वापर मुळाव्या सुविधांच्या निर्मिती खातीर जातलो. इलेक्ट्रीक वाहनां खातीरच्या अनुदानांत 22 टक्क्यांनी वाड जाल्या.

मानव संंसाधन कर्मचार्‍यां खातीर 10 टक्के राखीव जागे

मानव संसाधन उदरगत म्हामंडळांत हावसकिपींग आनी सुरक्षा रक्षकाचें प्रशिक्षण दितात. तीन वर्सांच्या प्रशिक्षणा उपरांत पुलीस, उजो पालोवपी दळ आनी रान खात्यांत नोकरी खातीर 10 टक्के राखीव जागे आसतले.

गोंयांत विश्व कोंकणी संमेलन

गोंयांत विश्व कोंकणी संमेलन जातले. कोंकणी भाशा भवना खातीर 9 कोटींची तजवीज आसा. सरकारी राजपत्रां कोंकणींतल्यान जारी करपा खातीर यत्न सुरू आसात.

राज्य अर्थ आयोग अहवाल दितलो

राज्य अर्थ आयोग स्थापन जावन आयोगाच्यो बसका चालू आसात. राज्य अर्थ आयोग बेगिनूच अहवाल सादर करतलो, अशें मुख्यमंत्र्यांनी सांगलें.

– पर्यटन वाडचे म्हूण सरकाराचे यत्न सुरू आसात. पर्यटन परवाने तशेंच अबकारी परवाने पयलीं तीन

वर्सांनी घेवचे पडटाले. आतां परवान्यांची मुजत 5 वर्सांची केल्या.

– हॉटेलांची ऑनलायन नोेंदणी सुरू जाल्या. आतां मेरेन 6 हजार हॉटेलांची नोंदणी जाल्या. वेलनेस टुरिझम, हिंटरलँड टुरिझम, आध्यात्मीक पर्यटन अशें प्रकारचे पर्यटन सुरू जावपाची प्रक्रिया सुरू जाल्या.

-जी 20 परिशदेच्या बसकाक लागून गोंयची संस्कृती पुराय संवसारांत पावली.

-राष्ट्रीय खेळां सर्ती खातीर 225 कोटींची तजवीज अर्थसंकल्पांत आसा.