भांगरभूंय | प्रतिनिधी
म्हापशें, प्रतिनिधी ः कोलवाळे हाउसिंग इस्टेटांत दवरिल्ले साडेतीन हजार मीटर लांब इलेक्ट्रीक कंडक्टर छळ तार आनी स शीव रोलर अनवळखी चोरांनी चोरले. म्हापशें ते धारबांदोडे वीज केंद्राक जोडपा खातीर ही तार दवरिल्ली.
ही चोरीची घडणूक फाटल्या दिसा 17 सप्टेंबराक दनपारां 2 ते 22 सप्टेंबराक दनपारां 12 वरां मजगतीं घडली. उत्तर प्रदेशांतल्या वाराणसी शारांत आशिल्ल्या ज्योती स्ट्रक्चर लिमिटेड हे कंत्राटदार कंपनीचे वरिश्ठ वेवस्थापक राजेश कुमार पटनायक हांणी हे चोरी संबंदी कोलवाळे पुलिशेत कागाळ केल्या.
म्हापशें ते धारबांदोडे वीज केंद्रा मदीं वीज लायन घालपाचें काम वयल्या कंपनीक वीज खात्यान दिलां. ते प्रमाण कंत्राटदार कंपनीन कोलवाळ हाऊसिंग इस्टेटांतल्या उक्त्या वाठारांत इलेक्ट्रीक कंडक्टर तार आनी शीव रोलर दवरिल्लो. तातूंतले स शीव रोलर आनी सुमार साडेतीन हजार मीटर तार चोरली.
कोलवाळे पुलिशेंत कागाळ केले उपरांत पुलिसांनी दुबावितां आड कलम 379 खाला चोरीचो गुन्यांव नोंद केला. फुडली चवकशी पुलीस उपनिरिक्षक भरत खरात करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
