भांगरभूंय | प्रतिनिधी
प्रधान जिल्हो न्यायाधिशा वरवीं चवकशी करची
6 कैद्यांनी बंदखण प्रशासना अाड दाखल केल्ले याचिके वयलो निवाडो राखीव
पणजी : कोलवाळ बंदखणींतल्या 6 कैद्यांनी छळणूक केल्ले प्रकरणांत बंदखण प्रशासना आड खंडपिठांत याचिका दाखल केल्ली. हे याचिके वयली सुनावणी पुराय जाल्या. पूण निवाडो न्यायालयान राखीव दवरला. कार्बोटकार- टारझन गँगवॉरा उपरांत कोलवाळ बंदखणींतल्या कैद्यांची बंदखण प्रशासनान छळणूक केल्ल्लाचो आरोप आसा.
मजगतीं, कैद्यांनी केल्ल्या आरोपांची उत्तर गोंय प्रधान जिल्हो न्यायाधिशा वरवीं चवकशी करपाची सुचोवणी खंडपिठा वरवीं करतले, अशी म्हायती अॅड. अभिजीत कामत हांणी ‘भांगरभूंय’ प्रतिनिधी कडेन उलयतना दिली.
ह्या प्रकरणांत बुधवारा सुनावणी जाली. कार्बोटकार – टारझन टोळी झुज जाले उपरांत 18 कैद्यांक वेगळे दवरिल्ले. तातूंतल्या 15 जाणांक सामान्य विभागांत दवरल्यात, अशी म्हायती राज्य सरकारान खंडपिठाक दिल्या. तशेंच कैद्यांनी केल्ल्या आरोपाची सत्र न्यायालयाच्या न्यायाधिशा वरवीं चवकशी करतले. तशें निर्देश उच्च न्यायालयान दिल्यात. हे याचिके वयलो निमाणो निवाडो राखीव दवरला, अशें अॅड. कामत हांणी सांगलें.
मजगतीं, 18 कैद्यांतल्यान विजय कार्बोटकार, टारझन पार्सेकार आनी विकट भगत ह्या तीन कैद्यांक वेगळ्या विभागांत दवरिल्ले.
कार्बोटकार – टारझन गँगवारा उपरांत अामची छळणूक केल्ल्याचो अारोप करून 6 अंडरट्रायल कैद्यांनी कोलवाळ बंदखण प्रशासना विरोधांत याचिका दाखल केल्या. ह्या कैद्यांत समीर शेख, कुर्बान शेख, इस्माईल मुल्ला, सादीक बेल्लारी, मुस्तफा शेख आनी महमद शरीफ शेख हांचो अास्पाव आसा. याचिकेंत राज्य सरकार, गृहखात्याचे सचीव, पुलीस म्हासंचालक, बंदखण म्हानिरिक्षक, ओमवीर सिंग बिश्नोई (आयपीएस) आनी बंदखण अधिक्षक हांकां प्रतिवादी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
