भांगरभूंय | प्रतिनिधी
पणजी, प्रतिनिधी : गोंय जमीन बांदकाम निर्बंध कायदो 1995 खाला कोमुनिदादींतल्या अतिक्रमणाच्यो सगल्यो कागाळी एका वर्सां भितर निकालात काडटले. हे विशींचे अधिकार प्रशासकांक आसा, अशें येणावळ मंत्री बाबूश मोन्सेरात हांणी सांगलें. समाजाच्या हिता खातीर कोमुनिदाद संस्था आनी कोमुनिदाद संहितेत दुरुस्ती जावपाची गरज आसा, अशें तांणीय सांगलें.
कोमुनिदाद कोड कलम 652 खाला आयज कोमुनिदाद परिशद जाली. परिशदेच्या उक्तावणाक येणावळ मंत्री बाबुश मोन्सेरात उलयताले.
राज्यांत 223 कोमुनिदादी आसा. कोमुनिदादींचो वेव्हार सारको चलचो म्हूण कोमुनिदाद प्रशासकांची वेवस्था आसा. अतिक्रमणांचें सर्वेक्षण करपा खातीर काय कोमुनिदादींनी सर्वेक्षकांची वेवस्था केल्या. कोमुनिदाद कर्मच्याऱ्यांक पगार दिवपा खातीर 2.5 कोटींची तजवीज आसा. जमनीचो वापर योग्य तरेन आनी योग्य कामा खातीर जावपाक जाय. हे परिशदेंत संमत जावपी थारावांची कार्यवाही करपाक सरकार बांधील आसा,अशें तांणी सांगलें.
कोमुनीदाद परिशद सुरू आसतना कांय लोकांनी सभाघरा भायर प्रवेश मेळूंक ना, म्हूण निदर्शनां केलीं. प्रा. रामराव वाघ, वाल्मिकी नायक, अॅड. गजेंद्र उजगांवकार आनी हेरांनी निदर्शनां केलीं. परिशद बेकायदा आशिल्ल्याचो आरोपूय तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
