भांगरभूंय | प्रतिनिधी
मडगांव, प्रतिनिधी: कोंकणींतल्यान अणकारप्यांचीं पदां रद्द करून ताचे सुवातेर संशोधक घालपा खातीर मंत्रीमंडळान राजभास खात्याक दिल्ले मान्यताये वयल्यान सरकार फकत प्रयोग करता हें स्पश्ट जालां. कोंकणींत राजपत्र उजवाडावप आनी राजभास कायद्याची प्रभावी अंमलबजावणी करप हें खूब पयसुल्लें सपन उरलां, अशें विरोधी पक्ष फुडारी युरी आलेमाव हांणी म्हणलें.
राजभास खात्यांत कोंकणी संशोधन केंद्र स्थापन करपाक मंत्रीमंडळान मान्यताय दिल्ल्याचो उल्लेख करून सरकारान राजभास कायदो चालीक लावपाक अपेस आयिल्ल्याची विरोधी फुडार्यांनी टिका केली. नव्यो- नव्यो घोशणा दिवप, येवजण्यो आंखप आनी नामना मेळोवपाचें ह्या सरकाराक पिशें लागलां, पूण तातूंतल्यान कसलोच परिणाम दिसून येना, अशें युरी आलेमाव हांणी सांगलें.
राजभास विभाग प्रशासन कोंकणी चालीक लावपांत अपेशी थारला. शासनाच्या ताज्या निर्णयाक लागून अनुवादकांचीं पदां रद्द जाल्यांत. नामनेचे कोंकणी लेखक अॅड. उदय भेंब्रे हांणी संशोधन शिक्षण खात्याच्या कार्यक्षेत्रांत येवंक जाय आनी गोंय विद्यापीठ हे कोंकणी भाशेंत संशोधन करपा खातीर योग्य माची अशे विचार उक्तायल्यात. तांचें मत आपणाक मान्य आसा, अशें आलेमांव हांणी म्हणलां.
राजपत्राच्या अणकारा खातीर तिगां अणकारप्यांक राजभास विभागान मुद्रण आनी स्टेशनरी विभागा खातीर नियुक्त केल्ल्याची म्हायती सरकारान फाटल्या विधानसभा अधिवेशनांत दिल्ली. मात, आतां मेरेन राजपत्र इंग्लीशींतल्यानूच प्रकाशीत जाता. सरकाराक कोंकणी अणकारप्यांची कित्याक गरज आसा? खरें म्हळ्यार राजपत्र कोंकणींत आसपाक जाय आनी तें मागीर हेर भाशांनी अणकारीत जावपाक जाय, अशेंय तांणी म्हणलें.
कोंकणी भाशेंतल्यान वेवसाय हाताळपाक सरकारी अधिकार्यांक प्रशिक्षण दिवपाक सरकारान बेगोबेग कृती आराखडो तयार करचो. सरकारी कर्मचार्यांक कोंकणी भाशेचें चड गिन्यान आसचें देखून कोंकणी भाशेंतल्या तज्ञांक आपोवन व्हडा प्रमाणांत कार्यशाळो घडोवन हाडच्यो अशें युरी आलेमाव हांणी सांगलें.
फकत गोंयकारांकूच सरकारी नोकरी मेळची अशी वेवस्था सरकारान करप ही काळाची गरज. राजभास कायदो आनी भरती नेमांत दुरुस्ती जावचे खातीर सगल्या सरकारी भरतीं खातीर कोंकणीचें शिक्षणीक गिन्यान सक्तीचें करपाक हांवें पयलींच मुख्यमंत्र्याक पत्र बरयलां अशें आलेमाव हांणी पत्रकारांचे नदरेक हाडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
