भांगरभूंय | प्रतिनिधी
अशांतताय पातळची न्हय, म्हूण खाशेले यत्न
वाळपय, प्रतिनिधी : केरी- सांखळेच्या अल्फाज खान ह्या नेण्ट्या भुरग्यान सोशल मिडियाचेर अयोध्या प्रकरणांत आक्षेपार्ह विधान केल्ल्यान केरी वाठारांत तणाव निर्माण जाल्लो. हे विशीं मुस्लिम समाजान बसका घेवन निर्णय घेवपाचें पुलिसां मुखार स्पश्ट केल्लें. त्या भुरग्याक गांवांत दवरचो न्हय, त्या कुटुंबान ताका दुसरे कडेन धाडचो, असो निर्णय घेतला. मात, रामभक्तांक हे विशीं स्पश्ट कांय कळूंक नाशिल्ल्यान तांणी थळाव्या मुस्लिमांक जाब विचारपाचें थारायलां, अशें कळटा. ह्या वाठारांत अशांतताय निर्माण जावन नव्यान वादाची कीट पेटची न्हय, हे खातीर पुलीस खाशेले यत्न करतात, अशीय म्हायती मेळ्ळ्या.
पोस्ट व्हायरल जातकच 500 परस चड रामभक्त तरणाट्याच्या घरा गेले, पूण तो मेळूंक नाशिल्ल्यान पुलीस स्टेशनाचेर गेले. ताका आमच्या ताब्यांत दिवचो अशी मागणी तांणी केली. मागीर पुलिसांनी गांवच्या मुस्लिमांच्या प्रतिनिधींक आपोवन चर्चा केली. दोन दिसांनी आमी निर्णय घेता, अशें तांणी पुलिसांक सांगलें. तरणाट्याचें कुटुंब परप्रांतीय. ताचो बाबा गंवडीकाम करता. चल्याक गांवांतल्यान दुसरे कडेन धाडल्यार तणावाची परिस्थिती निर्माण जावची ना, अशें तांणी त्या कुटुंबाक सांगलां, अशी म्हायती मेळ्ळ्या. मात, रामभक्तांक हें खबर नाशिल्ल्यान ते मुस्लीम समाजाच्या प्रतिनिधींक जाब विचारपाचे आसात, अशेंय कळटा. पुलीस दोनूय गटांची बसका घेवन तोडगो काडपाचे आसात.
सध्या पुलिसांनी ताब्यांत घेतिल्ल्या अल्फाज खान ह्या नेण्ट्या भुरग्याक ‘अपना घरां’त दवरला, अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
