भांगरभूंय | प्रतिनिधी
सुमार 15 हजार चोरयेक गेल्ल्याचो अदमास
पेडणें: केरी-पेडण्यां आजोबा देवळाची फंड पेटी फोडपाचो प्रकार घडलो. नेमके कितले पयशे फंड पेटयेंत आशिल्ले हाची म्हायती देवस्थान समितीक नाशिल्ली. तरी लेगीत अदमाशेक 15 हजार रुपया चोरयेक गेल्ल्याची शक्यताय उक्तायली. मजगतीं, फाटल्या पंदरा दिसां पयलीं देवस्थान समितीन फंड पेटी रिती केल्ली. नाजाल्यार लाखांनी रुपयांची चोरी जावपाची.
चोरयेची म्हायती म्हाजनांनी पेडणें पुलिसांक दिले उपरांत पुलीस घडणूक थळार येवन पंचनामो केलो. वास घेवपी सुण्याक हाडलें, पूण चोरांचो तपास लागलो ना.
हे विशींची म्हायती दितना पेडणेंचे पुलीस निरिक्षक सचीन लोकरे हांणी सांगलें, जे पद्दतीन चोरांनी चोरी केली ते विशींचो तपास चालू आसा.
मजगतीं, निरिक्षक सचीन लोकरे हांणी फाटल्या दोन दिसां पयलीं पेडणें पुलीस शिमेंतले दुकानदार, देवस्थान समित्यो, सोनार वेवसायिकांची एक जोड बसका घेवन मोलादीक सामान घरांत वा दुकानांत दवरिनासतना सुरक्षीत सुवातेर दवरचें. देवळांतल्या देवांचें भांगर सुरक्षीत सुवातेर दवरचे. तशेंच फंड पेटयेंत चड पयशे दवरिनासतना ती फंड पेटी खाली करून वाठारांत सीसीटीव्ही कॅमेरे बसोवपाची सुचोवणी केल्ली.
सद्या पेडणें म्हालांत चोरांचो वावर वाडला. दुचाकी वाहनांय चोरपाचे प्रकार घडत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
