भांगरभूंय | प्रतिनिधी
पणजी, प्रतिनिधी: भारतांत विदेशी बायलां आड बलात्कार, तांचें शोशण अश्या जायत्या घडणुकांचो आंकडो वाडतूच आसा. हें लक्षांत घेवन कॅनडान आपल्या पर्यटकां खातीर खबरदारीची सुचोवणी (मार्गदर्शक तत्वां) जारी केल्या. भारत आनी कॅनडाचे राजकी संबंध इबाडिल्ल्यान कॅनडान भारतांत येवपी पर्यटकां खातीर नवी खबरदारीचीं मार्गदर्शक तत्वां जारी केल्यांत. ते प्रमाण गोंयांत बायलां पर्यटकांक सादूर रावचें अशें सांगलां. भारतांत बायलां आड गुन्यांव वाडला अशेंय कॅनडाच्या अधिसुचोवणेंत सांगलां.
भौशीक येरादारी वेवस्था, योग केंद्र, आश्रम, अध्यात्मीक सुवातांचेर वतना मात्शें चड सादूर रावचें. जायते फावट थळावें प्रशासन शोशणा आड केल्ल्या कागाळींचेर आडनदर करतात हेंय लक्षांत दवरचें अशें सुचवणेंत म्हणलां.
तशेंच बायल पर्यटकांनी एकटें भोवचें न्हय. विशेश म्हळ्यार रातचें एकटें भोवचें न्हय. टॅक्सी, रिक्शेन प्रवास करतना जागृत रावचें. अनोळखी मनशां कडेन वेव्हार करतना जतनाय घेयात. कोणेंय जेवण वा पिवपाक कितेंय दिल्यार सादूर रावचें. गर्दी जाल्ली सुवात शक्य तितली टाळची. थळाव्या परंपरेक आनी भेसाक आदर दिवचो अशेंय कॅनडाच्या मार्गदर्शक तत्वां सुचोवणेंत सांगलां.
भारतांत आतंकवादी हल्ल्याचो अलर्ट
भारतांत खंयचेय सुवातेर आतंकवादी हल्ले जावपाची शक्यताय आशिल्ल्यान कॅनडाच्या नागरिकांनी सादूर रावचें अशें कॅनडाचे सुचवणेंत म्हणलां. जम्मू- काश्मीर वांगडा पाकिस्तानाक तेंकून आशिल्ल्या शिमेवेल्या राज्यांनी प्रवास करचो न्हय अशेंय म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
