भांगरभूंय | प्रतिनिधी
नवी दिल्ली, खबरां संस्था ः कॅनडांत शिकपाक वचपी भारतीय विद्यार्थ्यांचो आंकडो तीन म्हयन्यांत 86 टक्क्यांनी देंवलो. फाटल्या वर्सा जूनांत जाल्ल्या खालिस्तानी आतंकवादी हरदीप सिंह निज्जर हांचे हत्ते उपरांत दोनूय देशांत तणाव निर्माण जाले. हाकाच लागून विद्यार्थ्यांचो आंकडो उणो जाला अशी म्हायती कॅनडाच्या इमिग्रेशन मंत्र्यान दिल्या.
फाटल्या वर्सा जुलय ते सप्टेंबर ह्या काळांत 1 लाख 8 हजारां परस चड भारतीय भुरग्यांक अभ्यासाचे परवाने दिल्ले. त्याच वेळार ऑक्टोबर ते डिसेंबर ह्या काळांत फकत 14,910 भारतीय भुरग्यांनी अभ्यास परवान्या खातीर अर्ज केलो. अशे तरेन विद्यार्थ्यांच्या संख्येंत 86 टक्क्यां मेरेन उणाव जालो.
मंत्री मार्क मिलर हांणी म्हणले आतां भारतांत फकत 21 कॅनडियन अधिकारी काम करतात. कॅनडांत भारतीय कामगारांची संख्या पयलींच उणी आशिल्ली. अधिकाऱ्यांच्या उणावाक लागून विद्यार्थ्यांक कॅनडांत शिकपा संबंदीत चडशी म्हायती मेळूंक नाशिल्ली. त्याच वेळार ऑटवांतल्या भारतीय उच्चायुक्ताचे सल्लागार सी गुरू सुब्रमण्यम हांणी सांगलें, निवासी आनी शिकोवपाच्यो सुविधा नाशिल्ल्यान भारतीय विद्यार्थ्यांक कॅनडाक येवपाची इत्सा ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
