भांगरभूंय | प्रतिनिधी
वास्को बागायतदारा कुशीक उडयतात कोयर
वास्को: एफ. एल. गोम्स मार्गा वयल्या बागायतदार कुशीचें गटार आनी रस्त्याचे कुशीक व्हड प्रमाणांत कुशिल्ली भाजी, फळां आनी हेर कोयर उडयत आशिल्ल्यान थंय दुचाकी वाहनां उबी करपाक वाहन चालकांक त्रास जाता. तशेंच कांय विक्रेत्यांनी आपली भाजी, फळांच्या दुकानांचो विस्तार करून मुरगांव पालिके सामकार आवाहन उबे केलां. ह्या दुकानांच्या विस्ताराक लागून येरादारीक आडखळ निर्माण जायत आशिल्ल्यान वास्को येरादारी पुलिसांनी मुरगांव पालिकेक खूबशी फावटी कळीत केलां. पूण कांय वेळार दोळ्यांक उदक लावपी कारवाय जाता आनी परतून आशिल्लो तसो प्रकार सुरू जाता.
भाजी मार्केटांतली कांय भाजी, फळां विकपी आपली कुशिल्ली आनी टाकावू भाजी, फळां बागायतदार बाजारा कुशीच्या रस्त्याचे कुशीक उडयतात. तातूंतलो खूबसो कोयर गटारांनी पडत आसा. थंय दुचाकी पार्किंगेची वेवस्था वास्को येरादारी पुलिसांनी केल्या. पूण थंय व्हड प्रमाणांत कोयर उडयत आशिल्ल्यान घाण पातळिल्ल्यान दुचाकी वाहन चालकांक आपलीं वाहनां थंय उबीं करूंक मेळनात.
ह्या प्रकरणांत संबंदितांनी योग्य ती कारवाय करपाची गरज आशिल्ल्याचें दुचाकी वाहन चालक रमेश कळशावकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
