भांगरभूंय | प्रतिनिधी
फोंडें, प्रतिनिधी: कुर्टी खांडेपाराच्या सरपंचपदार हरीश नायक हांची सोमारा विरोधा विणें निवड जाली. संजना नायक हांणी सरपंच पदाचो राजिनामो दिल्या उपरांत हें पद रितें आशिल्लें. फाटल्या तीन वर्सांनी तिसरे सरपंच म्हणून हरीश नायक हांची निवड जाल्या. नगराध्यक्ष रितेश नायक आनी नगरसेवक आनंद नायक हांणी सरपंच हरीश नायक हांकां परबीं भेटयलीं.
सोमारा सकाळीं पंचायत कार्यालयांत जाल्ले बसकेंत वट्ट ७ पंच वांगडी हाजीर आशिल्ले. सरपंच पदा खातीर हरीश नायक हांचो एकूच अर्ज आशिल्ल्यान ताची विरोधा विणें निवड जाल्ल्याची घोशणा निरीक्षक म्हणून काम पळोवपी गट विकास अधिकारी सोमनाथ तारी हांणी जाहीर केलें. तेन्ना उपसरपंच विल्मा परेरा आनी हेर पंच वांगडी हाजीर आशिल्ले.
सरपंचपदार निवड जाल्या उपरांत हरीश नायक हांणी सगळ्या पंचायत मंडळान विश्वास दाखोवन बिनविरोध निवड केल्ले खातीर उपकार उक्तायले. सगळ्या पंच वांगड्यांक विस्वासांत घेवन विकास कामां करतले अशें सांगलें.
फोंडेंचे नगराध्यक्ष रितेश नायक हांणी पंचायत वाठारांतली जायतीं उदरगतीचीं कामां पुराय जावपाचे वाटेर आसात. तशेंच नव्या कामा खातीर प्रक्रिया सुरु केली. लोकांच्या सहकार्यान सगळीं उदरगतीचीं कामां पुराय करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
