कुमारजुंव्यां 22 जानेवारीक मटण, नुस्ते सोरो विक्रिचेर बंदी
भांगरभूंय | प्रतिनिधी
पणजी ः अयोध्येत जावपी श्री राम मूर्ती प्राणप्रतिश्ठापणा निमतान देशभरांत वेगवेगळ्या कार्यावळीचे आयोजन केलां. हे दिसा कुमारजुंवेंच्या श्रीराम मंदिरात भव्य कार्यावळीचे आयोजन केला. हे निमतान कुमारजुंवें पंचायतीन वाठारांतल्या मटण, चिकन, नुस्तें, फास्ट फुड विकपी, मांसाहारी हाॅटेल, बार धनी, सोरो विकप्यांनी सोमार २२ जानेवारीक दीसभर दुकानां बंद दवरचीं, असो उलो मारला. अयोध्येंत राम मूर्ती प्रतिश्ठापना जाता, तशेंच कुमारजुंवेच्या श्रीराम देवळांत व्हडलो उत्सव आसा. देखून सहकार्य करचें, अशें सरपंचान कळीत केलां. कुंभारजुवे पंचायत मंडळाची बसका 17 जानेवारीक जाली. बसकेंत हे निर्णय घेतले. हे संबंदी भौशीक सुचोवणीय जारी केल्या.
श्री राम मूर्ति प्राणप्रतिष्ठा उत्सव सोमारा 22 तारखेक श्रीक्षेत्र अयोध्या धाम हांगा जातलो. आमच्या गांवांतल्या श्रीराम देवळांतय एक व्हडलो उत्सव मनोवपाचो आसा. पूण गांवांत खंयच्याय प्रकारचे मटन, चिकन आनी नुस्तें तशेंच सोरो विकपाक बंदी आसतली. सगल्या विक्रेत्यांनी आनी दुकानदारांनी हे सुचोवणेची दखल घेवन सहकार दिवचो असो उल्लेख पंचायत मंडळान हे सुचोवणेंत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
