भांगरभूंय | प्रतिनिधी
पणजी ः पणजे बाजारांत फाटल्या 15 ते 20 दिसां सावन भाजयांचे वाडिल्ले दर अजूनय तशेंच आसात. पणजे बाजारांत सोमारा भेंडें, वालपापडी, डब्बू मिरसांग, दोडगीं, कारातीं, मिरसांग हांचे दर 100 रुपया किल आशिल्ले. मटाराचे दर वाडून 120 रुपया किल जाल्यात. लसणाचें मोल 400 रुपया किल आसा. जाल्यार आलें 200 रुपयांक तेंकलां.
वाडिल्ल्या दराक लागून घरकान्नींनी भाजी विकत घेतना बजेटाचो विचार करचो पडटलो. उण्या उत्पादनाक लागून आनी चड मागणीक लागून देशभर लसणाचे दर वाडल्यात. डिसेंबराच्या निमाण्या सप्तकांत राज्यांत लसूणाचे दर वाडिल्ले. सादारणपणान फेब्रुवारीच्या निमाण्या सप्तकांत लसुणाचे दर देंवपाची शक्यताय आसा.
कांय म्हयन्यां आदीं 100 रुपयां मेरेन पावपी कांदो आनी टोमॅटोचे मोल सध्या 40 रुपया किलाचेर स्थीर आसा. बटाटोय 40 रुपया किल जाला. हाचे भायर सोमारा पणजे बाजारांत कोबी 30 रुपया आनी फ्लॉवर 40 रुपया आशिल्ले. कोथमिरी, मेथी, पालक, तांबडी भाजी सादारणपणान दर जुडीक 15 ते 20 रुपया दरान विकताले. जाल्यार लिंबाचे दर 20 रुपयांक 5 ते 6 आशिल्ले. गांवठी भाजयांचें, फळांचें मोल भायल्यान येवपी भाजयां परस चड आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
