भांगरभूंय | प्रतिनिधी
पंचायतीच्या गांव बाल समिती वतीन उपक्रम
म्हापशें: कळंगूटे शाळांनी किशोर पिरायेच्या चलयां खातीर म्हयन्याची पाळी, भलायकी आनी नितळसाण हाचेर म्हायती दिवन सुमार 640 विद्यार्थिनींक सॅनिटरी नॅपकिन्साचें वितरण केलें.
कळंगूट पंचायतीच्यो उपसरपंच आनी गांव बाल समितीच्यो अध्यक्ष गीता लक्ष्मण परब हांच्या फुडाकारान ही कार्यावळ जाली. ह्या वेळार उपक्रमाच्यो संसाधन अधिकारी डॉ. दिक्षा दिवकार हाजीर आशिल्ल्यो.
गांवांतलें डॉन बॉस्को हायस्कूल, लिटल फ्लॉवर ऑफ जिझस हायस्कूल, विद्यानिकेतन हायस्कूल आनी सेंट सावियो डॉमनीक हायस्कूल ह्या विद्यालयांनी समितीन हो उपक्रम राबयलो.
डॉ. दिक्षा दिवकार हांणी म्हयन्याचे पाळी वेळार भलायकी आनी नितळसाणीचें म्हत्व आनी किशोर पिरायेच्या चलयां खातीर भलायकी खातीर ही नितळसाण कित्याक गरजेची आसा हाची विस्तारान म्हायती दिली. समाजांत खोल मेरेन रुजिल्ल्यो प्रथा आनी ताचेर मात कशी करची. सॅनिटरी नॅपकिन्साचे म्हत्व त्यो कश्यो वापरच्यो आनी कश्यो नश्ट करच्यो हे विशींय मार्गदर्शन डॉ. दिवकार हांणी केलें.
सरपंच जोजफ सिक्वेरा आनी पंचायत मंडळाच्या पालवान समितीन हो उपक्रम येसस्वी रितीन राबयलो. हाचे मुखारूय गांवांतल्या भुरग्यांची सुरक्षीतताय आनी हिता खातीर ही समिती कार्यरत उरतली अशें आस्वासन उपसरपंच गीता परब हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
