भांगरभूंय | प्रतिनिधी
म्हापशें: सद्या गोंयांत डेंग्यू दुयेंसान धुमशेन कांडलां. हेच फाटभुंयेर कळंगूट पंचायतीन चालू म्हयन्यांत 415 जाणांची फुकट चांचणी घेतली. तातूंत 107 जाणांक डेंग्यूची लागण जाल्ल्याचें स्पश्ट जालां.
कळंगूट पंचायतीन 1 सप्टेंबरा सावन कांदोळेचे आदले भलयाकी केंद्र अधिकारी डॉ. दिक्षा दिवकार हांच्या पालवान गांवांतल्या लोकांची फुकट डेंग्यू चांचणी येवजण राबयिल्ली. कचेरेच्या काळांत पंचायत घरांत जाल्यार भौशीक सुटयेच्या दिसा डॉ. दिवकार हांच्या खोब्रावाडो हांगासरल्या घरा ही चांचणी घेताले.
हे विशीं सरपंच जोजफ सिक्वेरान म्हणलें, आमी फाटल्या 27 दिसांत 415 जाणांची चांचणी घेतली. हातूंत 107 जाण डेंग्यूचे दुयेंती सांपडले. ह्या दुयेंतीक डॉ. दिक्षा दिवकार हांचे सुचोवणे प्रमाण फुकट वखदांय पंचायतीन उपलब्ध केल्यांत.
तशेंच ह्या दुयेंतींच्या घरा आनी वाठारांत नेमान वखदांची फवारणीय पंचायती वतीन करतात. जेणेकरून दुयेंसाचो प्रसार टाळूं येतलो अशें सरपंच सिक्वेरान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
