भांगरभूंय | प्रतिनिधी
म्हापशें, प्रतिनिधी : आपल्याच 4 पिरायेच्या पुताचो खून केल्ल्याचो आरोप आशिल्ली सुचना सेठ आनी तिचो घोव व्यंकटरमण ह्या दोगांयकूय कळंगूट पुलिसांनी एकामेकां मुखार हाडलीं. दोगांय मदीं संवाद जावचो आनी तातुंतल्यान नवी म्हायती उक्ती जावची, ह्या हेतान पुलिसांनी हो निर्णय घेतिल्लो. हे 20 मिनटांचे भेटींत दोगांय मदीं एकेच गजाली वयल्यान वाद जायत रावले. ह्या 20 मिनटांचे भेटींत दोगांय रडत रावलीं आनी एकामेकांचेर आरोप करीत रावलीं.
सूचना सेठ प्रकरणांत सदांच एक- एक गजाली सामकार येतात. ते नदरेन पुलिसांनी फुडलो तपास करपाकूय सुरवात केल्या. शेनवारा सुचना सेठचो घोव व्यंकटरमणाक पुलिसांनी चवकशे खातीर आपयल्लो. ते प्रमाण तो आपल्या वकिला वांगडा हाजीर रावलो. बंगळुरुच्या कुटुंबीक न्यायालयान आपल्याक दर आयतारा भुरग्याक मेळपाची परवानगी दिल्ली. ते प्रमाण कांय आयतारा सुचना सेठ हांणी ताका आपल्या चल्याक मेळपाक दिल्लें. पूण ताचे उपरांतचे चार आयतार तिणें ताका मेळपाक दिवंक ना. पांचव्या आयतारा चल्याचो खून जालो, असो जबाब तांणी दिलो.
पुलिसांनी त्या दोगांयची भेट जाल्या उपरांत कितें तरी कळटलें, आनीक कांय म्हायती हाताक लागतली हें चिंतून दोगांय घोव- बायलेची भेट घडोवन हाडली. पूण हे भेटींत सुचनान आपणेंच पुताचो खून केला हें मान्य करूंक ना.
पुलीस निरीक्षक परेश नायक हांणी त्या दोगांयचे भेटी विशी म्हायती दिली, आमी त्या दोगांयची भेट घडोवन हाडली. तेन्ना एकामेका मुखार येतांच पयलीं तीं रडतूच आसलीं. व्यंकटरमण तिका परत परत भुरग्याचो खून कसो जालो हेंच विचारतालो. ताचे वयल्यान दोगांय मदीं वाद जालो. घोवाच्या प्रस्नांक बेजारून सुचना पुताच्या मरणाचो दोश व्यंकटरमणाक दिवपाक लागली. जाल्यार व्यंकटरमणूय तुकांच लागून भुरग्याक मरण आयलां अशें म्हणीत रावलो. तांचो वाद आनीक वाडचो न्हय देखून पुलिसांनी तांकां वेगळीं केलीं, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
