भांगरभूंय | प्रतिनिधी
असैमीक मरण म्हूण पुलिसांनी केलें नोंद
पणजी: कळंगूटे दोगां बायलांनी वेगळ्यावेगळ्या सुवातांनी गोळ घेवन आत्महत्या करपाची दुर्दैवी घडणूक घडली. थळाव्या एका 16 वर्सां पिरायेचे चलयेन आपल्या रावत्या घरांत जाल्यार एका नांदेड महाराष्ट्रांतल्या नवे व्हंकलेन एका नखेत्री हॉटेलांत आत्महत्या केली. ह्या प्रकरणांत पुलिसांनी असैमीक मरण म्हूण नोंद केलां. हे विशीं बार्देसचे न्यायदंडाधिकारी फुडलो तपास करतले.
कळंगूट पुलिसांनी दिल्ले म्हायती प्रमाण, खोब्रावाडो-कळंगूटे रावपी एका 16 वर्सा पिरायेचे चलयेन गोळ घेवन आत्महत्या केल्ल्याची म्हायती पुलिसांक आयतारा सकाळीं मेळ्ळी. हाची दखल घेवन पुलिसांनी घडणूक थळार धांव घेतली. उपरांत पुलिसांनी चवकशी करतकूच मरण आयिल्ली चली रक्षिता लामाणी हिणें आत्महत्या केल्ल्याचें मुखार आयलें. उपरांत पुलिसांनी कूड ताब्यांत घेवन बांबोळे गोमॅकॉच्या मड्या कुडींत दवरल्या.
दुसरी आत्महत्या कळंगूटे एका नखेत्री हॉटेलांत घडली. नांदेड महाराष्ट्रांतलो श्रीनिवास सरडे आनी ताची घरकान्न कोमल हांचें हालींच 25 दिसां पयलीं लग्न जाल्लें. उपरांत गोंयांत तांचो नखेत्री हॉटेलांत राबितो आशिल्लो. आयतारा सकाळीं श्रीनिवास भाड्यान दुचाकी घेवपा खातीर चवकशी करपा खातीर हॉटेला भायर गेल्लो. उपरांत परतून कुडींत आयलो तेन्ना कुडीचें दार भितरल्यान बंद आशिल्ल्याचें मुखार आयलें. उपरांत ताणें हॉटेलांतल्या कर्मचाऱ्यांचे मजतीन दार उगडलें तेन्ना ताची घरकान्न कोमल हाणें गोळ घेतिल्ल्याचें दिसून आयलें.
उपरांत तिका कांदोळे मुळाव्या भलायकी केंद्रांत व्हरतकूच तिका वाटेरूच मरण आयलें. ह्या प्रकरणांत पुलिसांक खबर मेळटकूच असैमीक मरण म्हूण नोंद केला. ह्यो दोनूय आत्महत्ये विशीं बार्देसचे जिल्होदंडाधिकारी फुडलो तपास करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
