भांगरभूंय | प्रतिनिधी
कर्जत: नामनेचे कला दिग्दर्शक नितीन देसाय (58) हांणी आयज बुधवारा फांतोडेर आत्महत्त्या केल्ल्याचें उक्ताडार आयलां. तांच्या कर्जत हांगाच्या एन. डी. स्टुडिओंत तांणी गोळ लावन घेतलो. नितीन देसाय हांणी हिंदी, मराठी चित्रपटांनी, इतिहासीक टीव्ही माळांनी कला दिग्दर्शनाचें (नेपथ्य, सेट उबारप) काम केलां. तांचे आत्महत्येक लागून चित्रपट मळार दुख्ख पातळ्ळां.
पुलिसांनी दिल्ले म्हायती प्रमाण, नितीन देसाय हे स्टुडिओंतूच रावताले. मंगळारा रातच्या 10 वरांचेर ते आपल्या रुमांत गेले. सकाळीं बरोच वेळ भायर येवंक नाशिल्ल्यान तांचे अंगरक्षक आनी हेरांनी कुडीच्या दाराचेर मारलें. पूण आवाज येवंक ना. तेन्ना जनेलांतल्यान नितीन देसाय हांची कूड फॅनाक लोंबकळिल्ल्याचे अवस्थेंत दिसली. नितीन हांच्या कर्मचार्यांनी हे घडणुकेची म्हायती पुलिसांक दिली. पुलिसांनी उपरांत तांची कूड पोस्टमॉर्टेमा खातीर धाडली.
‘राजू चाचा’, ‘मुन्नाभाई एमबीबीएस’, ‘लगे रहो मुन्ना भाई’, ‘दोस्ताना’, ‘हम दिल दे चुके सनम’, ‘लगान’, अश्या सुपरहीट चित्रपटांनी नितीन देसाय हांणी सेट उबारल्यात. बिग बॉस सारकिल्ल्या शोच्या नेपथ्याचेंय कांम तांणीच केल्लें.
मजगतीं, नितीन देसाय फाटल्या कांय दिसां सावन अर्थीक अडचणींक तोंड दितल्याचें उक्ताडार आयलें. तांचेर कोटींनी रुपया रीण आशिल्लें. ताकाच लागून ताणी आत्महत्या करपा सारकें पावल उबारलें, अशें म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
