करासवाडो- म्हापशेंचो शिवाजी महाराजांचो पुतळो केलो विद्रूप
भांगरभूंय | प्रतिनिधी
दुबावितांक बेगोबेग अटक करपाची शिव मोगींची शिटकावणी
म्हापशें ः फादर बोल्मेक्स परेरा हांणी छत्रपती शिवाजी महाराजाचेर केल्ल्या विधाना उपरांत निर्माण जाल्लो वाद शांत जाता म्हणसर आतां आकय – करासवाडो हांगाचो छत्रपती शिवाजी महाराजांचो पुतळो अज्ञात समाजविव्दाट्यांनी विद्रूप केल्याची घडणूक उजवाडाक आयल्या. हाका लागून शिवमोगींनी परतून तिडक उक्तायल्या. दुबावितांक बेगोबेग अटक करून तांचेर कडक कारवाय करात नाजाल्यार आमी ओगी रावचे नात अशी शिटकावणी तांणी दिल्या.
पोरूं शिवजयंती दिसा करासवाड्यार एके रातीं भितर छत्रपती शिवाजी महाराजांचो पुतळो उबारिल्लो. काल (आयतारा) मध्यान रातीं अज्ञातांनी ताचें तोंड विद्रूप केलां. ही गजाल (सोमारा) सकाळीं थळाव्या शिव मोगींक कळ्ळे बरोबर ते त्या सुवातेर धांवून गेले. तांणी म्हापशें पुलीस स्टेशनांत कागाळ केल्या. कायदो हातांत घेवपाची आमकां इत्सा ना. देखून पुलिसांनी दुबावीतांचो बेगोबेग सोद घेवन तांचे आड कायदेशीर कारवाय करची. अशें जालें ना जाल्यार आमी ओगी रावचे नात अशें शिव मोगींनी पत्रकारांक सांगलें.
फाटल्या वर्सा पुतळो स्थापन केले उपरांत कांय जाणांनी निशेध केल्लो. आमकां भेश्टोवपाचोय यत्न जालो. पूण, आमी सगळ्यांनी एकठांय येवन आमच्या धर्माचे आनी गोंयचे राखणे खातीर वावुरपी शिवरायाचो पुतळो उबारिल्लो. शिवाजी महाराज हो आमचो देव. ताची अशी विटंबणा आमी केन्नाच सोंसून घेवचे नात, अशें शिव मोगींनी सांगलें.
मजगतीं, घडणुकेची म्हायती मेळ्ळ्या उपरांत म्हापशें पुलिसांनी बेगोबेग सुवातेर वचून परिस्थितीची पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
