भांगरभूंय | प्रतिनिधी
राज्यांत ताण, दोशींक ख्यास्त दिवपाचें प्रधानमंत्र्यांचें आस्वासन
भांगरभूंय । खबरां संस्था
मणिपूर: मणिपूराक मे म्हयन्यांत लजेक घालपी घडणूक घडल्या. हांगा तीग बायलांची कपड्यां विणें धींड काडिल्ली. हे घडणुकेचो व्हिडियो बुधवारा व्हायरल जालो. ताका लागून पुराय राज्यांत तणाव निर्माण जाला. पुराय देशभर हे घडणुके विशी तिडके उक्तायल्या. मजगतीं, दोशी व्यक्तींचेर कडक कारवाय जातली, अशें आस्वासन प्रधानमंत्री नरेंद्र मोदी हांणी दिलां.
मणिपुरांत दोन बायलांची कपड्या विणें धींड काडून मागीर तांचेर सामुहीक बलात्कार केलो. ही घडणूक 4 मे 2023 दिसा मणिपुरच्या थौबाल जिल्ह्यांत घडिल्ली. उपरांत पुलिसांनी अज्ञात व्यक्तीं आड अपहरण, सामुहीक बलात्कार आनी खून करपाचो गुन्यांव नोंद केलो. पूण, दोन म्हयने जाले तरीय आरोपींक अटक जावंक ना. व्हिडियो व्हायरल जाले उपरांत आतां पुलीस आरोपींचो सोद घेतात.
दोन म्हयन्या पयलीं कांगपोकपी जिल्ह्यांतल्या फिनोम गांवांत आरोपींनी (हल्लेखोर) पिडेस्तांच्या घराचेर हल्लो केलो. घरातलें सगळें तोडून, फोडून, भांगरां- शिंगरां, पयशे लुटून घराक उलो लायिल्लो. ह्या घरांत रावपी पांचूय जाणांनी भियेवन लागींच्या रानांत धांव मारली. पुलिसांनी त्या पांचूय जाणांक सोदून हाडलीं आनी ते तांकां पुलीस स्टेशनाचेर घेवन येतना वाटेंत राविल्ल्या गुन्यांवकारांनी (हल्लेखोरांनी) तांचेर हल्लो केलो. ह्या हल्ल्यांत एकल्याक मरण आयलें. उपरांत तांणी त्या तिगूय बायलांचे कपडे काडून तांची धींड काडली. तशेंच तांचेर सामुहीक बलात्कार केलो. ह्या वेळार एके बायलेच्या भावान तिका वाटावपाचो यत्न केलो तेन्ना आरोप्यांनी ताचो खून केलो.
हो व्हिडीओ व्हायरल जाले उपरांत मणिपुरचे मुख्यमंत्री बिरेन सिंह (भाजपा) हांच्या राजीनाम्याची मागणी विरोधकांनी केली. प्रधानमंत्री ओगीच आशिल्ले, पूण तांणी आयज प्रतिक्रिया दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
