ओंकाराची सहल

भांगरभूंय | प्रतिनिधी

देड वर्सां पयलीं गोंय, सिधुदुर्गांत सांवार घालपी ओंकार हती आतां परत गोंयांत पावला. शीम वाठारांत तो दरवर्सा करता ती सहल शेतकार, बागायतदारांक लुकसाणेची थारपाक लागल्या. अजून तो हिंसक जावंक ना. नाजाल्यार ताचें येणें खूब मारक थारतलें. महाराष्ट्रांतल्यान ताका धांवडायला, देखून तो मोपा पावला. भूक लागतकच तो पीक खावपाक सुरवात करता. हतयाक मेळटा तितलें उणेंच. देखूनच शेतकामत्यां खातीर तो हुस्क्याचो विशय थारला. फाटले खेपे ओंकारान शेतां, भाटांतलें पीक खाल्लें ताची लुकसाण भरपाय सरकारान वतीन मेळिल्ली. मात, हे खेपे ओंकाराचो बंदोबस्त केलो जाल्यार वेंचणुकेक ताचो फायदोच जातलो.
ओंकाराची पिराय वाडल्या. म्हणटकच ताची भूकय वाडल्या आसतली. फाटले खेपे ताणें चारेक लाखांचें लुकसाण केल्लें. ताका धरचो अशी विनवणी सगल्याच सरपंचांनी केल्ली. रानां खात्यान कर्नाटक सरकाराची मजतूय घेवपाची घोशणा जाल्ली. ओंकार लुकसाण करतूच रावलो. हे खेपे तशें जावंचें न्हय. हती येतात, ते चडशे शेतां, भाटां, कुळागरां, पोरसां आसात त्या वाठारांनी. गोंयच्या शीम वाठार हो पिकाळ आशिल्ल्यान पेडणें, काणकोण, सत्तरी, धारबांदोडें वाठारांत ही जनावरां चड दिसतात. कायद्यान तांकां मारपाक मेळना. धांवडायतनाय तीं जखमी जावंक उपकारनात. म्हणटकच शेतकार कांय करपाक शकनात. कांय वर्सां फाटीं गोरवां खावपाक येवपी वाग आनी ताचे पेटे वीख खावन मेल्ले. तेन्ना शेतकारांक धरिल्ले. पूण राजकी आशिर्वाद आनी शेतकारांचे परिस्थितीक लागून हें प्रकरण मिटिल्लें. गोंयांत हतयांचो फावो तो बंदोबस्त करपाची शक्त सरकारी यंत्रणे कडेन अजून ना. म्हणटकच शेतकारांक तांचो त्रास जाता आनी खूब लुकसाण सोंसचें पडटा.
ओंकार हो एकटोच हेडपी टस्कर (सुळे आशिल्लो हती). ते कळपा पसून वेगळे जावन आपल्या जाय थंय हेडटात. कांय जाणांच्या मतान, कळपांत मस्ती करतकच तांकां मुखेल हती धांवडावन घालतात. खरें, फट कितें तें तांकांच खबर, कारण तांचेर कोण पाळत दवरून नासता. 2023- 24 त ओंकार गोंय- कर्नाटक शीमेर, मागीर महाराष्ट्रांत पावलो…. उपरांत बरोच तेंप गोंय, सिंधुदुर्ग असो हेडत रावलो. पोरूं वर्सभर तो दिसूंक ना. घडये कर्नाटकांतल्या अणशी, दांडेली अभयारण्यांत गेल्लो आसतलो. हतयांची हालचाल 100 ते 300 किलोमिटरां मेरेन आसता. आफ्रिकन हती दिसाक 25 ते 50 किलोमिटर सहज चलतात. भारतीय हतयाकूय 20 किलोमिटर अंतर चड त्रासाचें न्हय. तातूंत तांकां 10 किलोमिटर वाठारांत उदक खंय आसा तें कळटा खंय. म्हणटकच खावपाक खंय आसा, तेंय कळटा आसतलें. तांकां याद उरता, हें शास्त्रज्ञांनी सिद्ध केलां. ओंकाराक फाटले फावट खंय कितें खावपाक मेळिल्लें तें खबर आसतलेंच…. आनी तो थंयच वतलो. हो वाठार तसो सुरक्षीतूय आसा. देखून ताचे हालचालीचो अभ्यास करून ताका धरपाचो यत्न करपाक जाय.
हतयांक ऊस, केळीं, भाजी चड आवडटा. तो मनांत आयल्यार एके रातींत व्हडल्या वाठाराचें लुकसाण करपाक शकता. पेडणें, ओंकाराचे वळखीचें, म्हणटकच ताच्या मनांत भिरांत आसची ना. एकटो आशिल्ल्यान तो जाय तेंच करतलो. लोकूय लुकसाण टाळपाक आक्रमक जावंक शकतात. तेन्ना रानां खात्यान बेगीन उपाय काडचे. ताचेर लक्ष दवरचें. प्रशिक्षीत हती हाडून ताका धरचें. शेतां, पोरसां वाटावपाक गांवकारांक आतां जागरणां करचीं पडटलीं. सुरक्षीत अंतर दवरून आवाज करूं येता. सोलर वंय वापरुं येता. पूण सगलें कितें जाणकारांच्या सल्ल्यान जावचें. तीनूय राज्यांनी मेळून आतां उपाय काडूंक जाय. कितें वायट जावपाची वाट पळोवची न्हय. मनीस – हती संघर्श खर जाल्यार ताचें हतयाक आनी मनशाकूय लुकसाण जातलें.