भांगरभूंय | प्रतिनिधी
पणजी, प्रतिनिधी ः पुराभिलेख संग्रह खात्याचे मंत्री सुभाष फळदेसाय हांणी आयज पर्वरे सचिवालयांत आयोजीत केल्ले कार्यावळीत ऑनलायन पुर्तुगेज अणकार सेवेचें लोकार्पण केलें. हे कार्यावळींत तीन नामनेच्या शिक्षणीक संस्थां वांगडा समजीकाय कबलात जाली, तशेंच दोन संशोधनाभिमुख येवजण्यांचीय घोशणा जाली.
पुराभिलेख खातें आनी शिक्षणीक संस्थां मदीं सहकार्य वाडोवपा खातीर विद्या प्रबोधिनी म्हाविद्यालय, पर्वरी, संत सोहिरोबानाथ आंबिये सरकारी म्हाविद्यालय, पेडणे आनी पीईएसच्या रवी नायक म्हाविद्यालय, फोंडें हांचे वांगडा समजीकाय कबलात जाली.
मंत्री सुभाष फळदेसाय हांणी गोंयचो समृद्ध वारसो आनी इतिहासाचे संवर्धन करपाच्या उद्देशान दोन संशोधनाभिमुख येवजणांचो शुभारंभ केलो. पयली येवजण “मुख्यमंत्री पुराभिलेख प्रकाशन योजना,” – पुराभिलेख खात्यातल्या पुराभिलेख नोंदी आनी अनुवादांचेर आदारीत पुस्तकांच्या प्रकाशना खातीर आर्थिक सहाय्य दिवप हो ह्या येवजणेचो उद्देश आसा. ह्या पुस्तकांनी इतिहास, समाजशास्त्र, मानववंशशास्त्र, राजकारण, शासन आनी प्रशासन अशा विविद विशयांचो आस्पाव आसतलो. दुसरी येवजण “डॉ. पांडुरंग शेणवी पिसुर्लेकर रिसर्च फेलोशीप येवजण,” – पुराभिलेख खात्यातल्या पुराभिलेख नोंदीचेर आदारीत संशोधन प्रकल्प हातात घेवपाक संशोधन विद्वानांक प्रोत्साहन दिवप हो हे येवजणेचो उद्देश आसा. हे येवजणे खाला ज्युनियर पांवड्यार एक आनी सिनियर पांवड्यार एक अश्यो दोन फेलोशीप दर वर्सा दितले.
मंत्री सुभाष फळदेसाय हांणी गोंयचो समृद्ध इतिहास आनी वारसो सांबाळून दवरपाची गरज व्यक्त करून त्या खातीर अशें उपक्रम म्हत्वाचे आसा तशेंच लोकांक आनी खास करून फुडल्या पिळगेक गोंयच्या इतिहासाची जाणीव जावपा खातीर पुराभिलेखसंग्रह म्हत्वाचो आशिल्ल्याचे तांणी सांगलें. ऑनलायन पुर्तुगेज अणकार सेवेक लागून लोकांक वेळार आनी विश्वसनीय अणकार मेळपाक मजत जातली. 15 अनुवादकांचे पॅनल तयार केल्ले आसून एका पानाक 350/- रुपया हे प्रमाण लोक आपल्या दाखल्यांचो अनुवाद करून घेवपाक शकतात, अशें तांणी सांगलें.
चित्रपट, पुस्तकां, फोटोग्राफी, पुराभिलेख डिजिटायजेशन अशा माध्यमांतल्यान गोंयचो इतिहास आनी वारसो सांबाळून दवरपा खातीर सरकारचे यत्न आशिल्ल्याचेय तांणी सांगलें. शिक्षण सचीव प्रसाद लोलयेकार हांणी कबलातीतल्या उपक्रमांची तोखणाय करून संशोधक आनी विद्यार्थ्यांक ताचो फायदो जातलो, अशें सांगलें.
कार्यक्रमाक पुराभिलेख संचालनालयाचे संचालक रोहित कदम आनी कबलात जाल्ल्या म्हाविद्यालयांचे प्राचार्य आनी विद्यार्थी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
