भांगरभूंय | प्रतिनिधी
हेर पिकावळींचेय लुकसाण जावपाची भिरांत
पणजी : एल निनो चक्रीवादळाच्या प्रभावाक लागून ऑगस्ट म्हयन्यांत पावसाचें प्रमाण खूब उणें आशिल्ले. ऑगस्ट म्हयनो पावसा विणेंच गेलो. ताका लागून चवथी मेरेन पावस पडलो ना जाल्यार भात शेतीचेर परिणाम जावपाची शक्यताय आसा. राज्यांतल्या भाताच्या उत्पादनाचेर ताचो परिणाम जावपाची शक्यताय आसा. राज्यांत आतां मेरेन सरासरी परस पावसाचें प्रमाण मात्शें चड आसा. पूण फाटल्या जुलय आनी ऑगस्टांत मात पावसाचें प्रमाण उणें आसा. ताचो एकंदरीत भात शेतीचेर परिणाम जावपाची भिरांत शेतकारांनी उक्तायल्या.
अंदूं मॉन्सून उसरा दाखल जालो. 11 जून उपरांत मॉन्सूनाक गोंयांत सुरवात जाली. ते उपरांत शेतकारांनी भात पिकाच्या लागवडीक सुरवात केली. जुलयांत पावसाचें प्रमाण बरे आशिल्ले. पूण ऑगस्टांत पावसान विसव घेतिल्ल्यान शेतकारां मदीं निरशेवणी आसा. एन निनो चक्रीादळाच्या प्रभावाक लागून ऑगस्टांत पावसाचें प्रमाण उणें जालें. सरासरी परस 60 टक्क्यांनी पावस उणो पडला.
ऑगस्टांत सरासरी 28.67 इंच पावस पडटा. मात अंदूंच्या ऑगस्टांत तो फक्त 11.38 इंच पडला. ताका लागून भाताचें उत्पादन घेवपी शेतकारां मदीं हुस्क्याचें वातावरण आसा.
लागवड केल्ली भात शेती आतां म्हत्वाच्या टप्प्यांत आसून फुडल्या 15 दिसांत पावस पडलो ना, जाल्यार जमीन सुकून पीक करपुपाची शक्यताय आसा. वाडट्या तापमानाक लागून जमनीक वेरो पडपाचीय भिरांत आसा. अशीच स्थिती उरल्यार फक्त भात पिकूच न्हय, जाल्यार हेर पिकावळींक लेगीत धोको आसा. अंदूं 30 ते 40 टक्क्यांनी भात उत्पादन उणें जावपाक शकता.
वरद सामंत, प्रगतीशील शेतकार, धारबांदोडें
ऑगस्टांत पावसाचें प्रमाण खूबच उणें जालें. ही परिस्थिती कायम उरल्यार अंदूं भात पिकाचें लुकसाण जावपाची शक्यताय आसा. भाताचें वट्ट उत्पादन उणें जावपाक शकता. चवथी मेरेन पावस पडप गरजेचें, नाजाल्यार भात पीक तशेंच हेर पिकावळींचेरूय ताचो परिणाम जातलो. गौतम खांडेपार, शेतकार-रिवण
अजुनूय जमनींत ओलसाण, हुस्को करुं नाकात
ऑगस्टांत पावस उणो पडलो तरी अजुनूय जमनींत ओलसाण तिगून आसा. राज्यांतल्या भितरल्या वाठारांनी कांय प्रमाणांत पावस पडत आसा. भात वा हेर भाजयांच्या पिकांच्या वाडी खातीर तो फावोसो आसा. ताका लागून सध्या तरी हुस्को करपाची गरज ना, अशें कृशी खात्याचे संचालक नेव्हील अल्फान्सो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
