भांगरभूंय | प्रतिनिधी
बुधवारा जाप दिवपाचें मुख्यमंत्र्याचें आस्वासन
पणजी, प्रतिनिधी: अनुसूचीत जमाती खातीर (एसटी) राजकी आरक्षण दिवपाचे मागणे खातीर मिशन पॉलिटिक रिझर्वेशनाचो मोर्चा पणजे आडायलो. तेन्ना सभाघरांत विरोधी पक्ष फुडारी युरी आलेमाव आनी हेरांनी लक्षवेधी सुचोवणी मांडली. मुख्यमंत्र्यांनी एसटी राजकी आरक्षणा विशीं सरकाराचें धोरण स्पश्ट करपाची मागणी युरी आलेमाव हांणी केली.
जेवणाच्या काळा पयलीं ही लक्षवेधी सुचोवणी युरी आलेमाव हांणी मांडली. आमदार वेंझी व्हिएगस, विरेश बोरकार, क्रुज सिल्वा हांणी लक्षवेधी सुचोवणेचेर तेन्नाच सरकारा कडेन जाप मागली. एसटी आरक्षणाचे मागणे खातीर एसटी भाव मोर्चा हाडटा आनी मुख्यमंत्री मात फाल्यां जाप दिवपाचें आस्वासन दिता, अशें सांगत विरोधी आमदार उबे रावले. हो संवेदनशील विशय आसा. मुख्यमंत्र्यांनी आतांच जाप दिवपाची गरज आसा, अशें विरोधी आमदारांनी सांगलें.
विरोधकां खातीर हो विशय जसो संवेदनशील आसा, तसोच सरकारा खातीरूय संवेदनशील आसा, अशें सभापतींनी स्पश्ट केलें. हांव फाल्यां म्हळ्यार बुधवारा जाप दितां, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
