भांगरभूंय | प्रतिनिधी
बाणावले ग्रामसभेंत लोकांचो प्रस्न; कोलवें पंचायतीन 4 लाखांत उबारली शेड
मडगांव: बाणावली पंचायतीन एमआरएफ शेडी खातीर सुमार 37 लाख रुपयांचो खर्च कित्याक केलो अशें ग्रामसभेंत ग्रामस्थांनी विचारलें. लागसारच्या कोलवें पंचायतीन चार लाखा भितर शेड उबी केली. मागीर शेड उबारपा खातीर इतलो खर्च कसो येवंक शकता असो प्रस्न ग्रामस्थांनी केलो. हाचे पयलींच्या मंडळाचो तो निर्णय आशिल्ल्याचें पंचायतीन सांगलें.
बाणावलेची ग्रामसभा काल (आयतारा) सकाळीं पंचायत सभाघरांत जाली. उपरांत उलयतना गिल्डा फर्नांडीस हांणी सांगलें की, ग्रामसभेंत जॉन बार्रेटो हांचो जॅक सिक्वेरा हांचो पुतळो उबारपा खातीर अर्ज सादर केल्लो. ते प्रमाण ग्रामस्थांच्या मतान पुतळो उबारपा खातीर फुडली प्रक्रिया करपाचो थाराव घेतलो. सोपो विशींय ग्रामसभेंत चर्चा जाली. सोपो खातीर कंत्राटदार नेमल्यार बरें जातलें अशें मत मांडलें. ते प्रमाण पंचायत निर्णय घेतली.
वेस्टर्न बायपासाची सद्याची स्थिती कितें आसा, हे विशीं नागरिकांनी ग्रामसभेंत विचारलें तेन्ना न्यायालयांत हे विशींची याचिका दाखल करतले अशें सांगलें. हे विशीं कायदेशीर सल्लो घेतले उपरांत हाचे आदीं न्यायालयांत केल्लो अर्ज फाटीं घेतलो. आतां ग्रामसभेचे परवानगे प्रमाण सरपंचा कडल्यान न्यायालयांत याचिका दाखल करतले.
बोर्ड आनी होर्डिंग्ज प्रस्नाचेरूय ग्रामसभेंत चर्चा जाली. पंचायत वाठारांतले बोर्ड आनी होर्डिंग्ज हांची पळोवणी करतले. धनी कोण आसात हाची म्हायती घेतले. तांकां नोटिसो धाडटले. उपरांत फुडलो निर्णय घेतले. बेकायदो होर्डिंग्ज उबारिल्ले आसल्यार ते काडपाक सांगतले, आनी ते काडले ना जाल्यार दंडात्मक कारवाय करतले अशी म्हायतीय ग्रामसभेंत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
