भांगरभूंय | प्रतिनिधी
पणजी ः ‘एच.आय.व्ही./ एड्स (HIV/AIDS) प्रतिबंध आनी नियंत्रण कायदो 2017’ चे उल्लंघन जाल्यार ताची दखल घेवन कागाळींचेर उपाय काडपा खातीर बेगीनूच खाशेले अधिकाऱ्यांची (लोकायुक्त) नेमणूक करतलें. भलायकी खात्यान हे संबंदी अधिसुचोवणी जारी केल्या. हातूंत एच.आय.वी, एड्स आनी हेर दुयेंती संबंदीत केल्ल्या भेदभावाचो आस्पाव आसतलो.
गोंय सरकारान राज्य एच.आय.वी/ एड्स प्रतिबंध आनी नियंत्रण नेम 2024 जाहीर केल्यात. हाचे प्रमाण कायद्याचें उल्लंघना विशीं कागाळींची पुराय आनी स्वतंत्रपणान चवकशी जातली. चवकशींत एच.आय.वी. जाल्ले व्यक्ती, भौशीक भलायकी क्षेत्रांत काम करपी वैजकी तज्ञ वा ह्या मळार काम करपी संघटनाची मजत घेतले.
कायद्याचें उल्लंघन जाल्यार तीन म्हयन्यां भितर थारायिल्ल्या फॉर्मांतल्या अर्जांतल्यान लेखी वा व्यक्तिगत रितीन कागाळ करची पडटली. कागाळदाराक एसएमएस वा ईमेल वरवीं कागाळ पाविल्ल्याची म्हायती दिवप आवश्यक. हे संबंदी सगळ्या गजालींची नोंद दवरपाची जापसालदारकी लोकायुक्ताची आसतली. कागाळदाराची म्हायती गुप्त दवरपाचें बंधन आसतलें.
ह्या पदाचेर नेमणूक करपाची व्यक्ती जिल्लो वा सत्र न्यायालयांतलो न्यायाधीश वा निवृत्त न्यायाधीश आसूंक जाय वा ती व्यक्ती भौशीक भलायकी मळार 10 वर्सांचो अणभव आशिल्लो दोतोर आसूंक जाय वा सरकाराच्या कायदो विभागांत 10 वर्सांचो अणभव आसप गरजेचें. लोकायुक्त पदाचेर आशिल्ल्या अधिकाऱ्याची पदवी संयुक्त सचीवाची आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
