भांगरभूंय | प्रतिनिधी
भांगरभूंय । खबरां संस्था
नवी दिल्ली: जायत्या मोबायल वापरप्यांक भारत सरकाराच्या दूरसंचार खात्या वतीन आयज एक अलर्ट आयलो. अचकीत फोनाचेर अलार्म वाजून फोन वायब्रेट जालो. हो संदेश मोबायलाचेर भारत सरकाराच्या दूरसंचार विभागा कडल्यान आपत्कालीन अलर्ट सेवेची चाचणी आशिल्ल्याचें सांगतात.
मजेची गजाल म्हळ्यार अशे तरेची आपत्कालीन संदेश सेवा ट्रायल अलर्ट जारी करतले अशी सरकारा कडल्यान पूर्वकल्पना नाशिल्ली. ताका लागून नागरिकांनी हे शिटकावणे संबंदी खुबश्यो शक्यतायो उक्तायल्यात. ह्या अलर्टा उपरांत लेगीत केंद्र सरकाराच्या म्हायती आनी प्रसारण मंत्रालयान वा पीआयबीच्या ट्विटर हॅन्डलान अजूनय हे विशीं कसलीच म्हायती दिवंक ना.
सकाळीं धा ते साडे धा वरांचे सुमाराक जायत्या जाणांचे मोबायल फोन अचकीत वाजपाक लागले. हाचे उपरांत मोबायलाच्या स्क्रीनाचेर एक मेसेज आयलो. तातूंत म्हळां ‘हो संदेश भारत सरकाराच्या दूरसंचार खात्याच्या आपत्कालीन संदेश सेवाचो एक भाग’ म्हणून. कांय सेकंदां उपरांत तोच संदेश व्हॉयस मेल फॉर्मांत आयकूंक आयलो.
आपतकालीन संदेशात ‘ओके’ बटन क्लीक केल्यार ‘तुमकां अशे आपत्कालीन अलर्ट जाय?’ अशें विचारलें. तशेंच ‘हय’ आनी ‘ना’ अशे दोन पर्याय दिले.
मजेची गजाल म्हळ्यार हो संदेश सगळ्या एंड्रॉयड मोबायलांचेर आयलो. पूण एपल आयफोनाचेर अशी शिटकावणी मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
