उपअधिक्षक सलीम शेख हांकां राष्ट्रपती पदक

भांगरभूंय | प्रतिनिधी

15 ऑगस्ट दिसा मुख्यमंत्र्या हस्तुकीं करतले भोवमान

वास्को: वास्कोचे पुलीस उपअधिक्षक सलीम शेख हांचो स्वातंत्र्य दिसा मुख्यमंत्री डॉ. प्रमोद सावंत हांचे हस्तुकीं प्रतिश्ठींत राष्ट्रपती पदकान भोवमानीत करतले. तांकां राष्ट्रपती पदक मेळिल्ले खातीर विवीध मळा वेल्या मानेस्तांनी तांचें अभिनंदन केलें. तांकां 2017 वर्सा मुख्यमंत्री पदकान भोवमानीत केल्ले.
सलीम शेख हे 1991 वर्सा पुलीस खात्यांत पुलीस उपनिरिक्षक म्हूण पणजी पुलीस स्टेशनार रुजू जाल्ले. तांणी फाटल्या 32 वर्सांच्या काळांत गोंयच्या विवीध पुलीस स्टेशनांनी काम केलां. जंय ते गेले थंय तांणी आपल्या बऱ्या कामाची देख दिल्या.
वास्को येरादारी पुलीस उपनिरिक्षक आसतना तांणी येरादारी वेवस्थेंत शिस्त हाडली. सडा ते वास्को मजगतच्या चार किलोमिटर अंतरा खातीर मिनी बस चालक सुमार पावूण वर ते एक वर घेताले. ताका लागून प्रवाशांची मोटी गैरसोय जाताली. ह्या वेळार सलीम शेख हांणी सदर बस चालकांक शिस्त लावपा खातीर पावलां उबारिल्लीं.
तांणी सडा बस स्टॉपार आनी वास्को बस स्टॅण्डार पुलीस शिपाय दवरिल्ले. सडा सावन बस सुटले उपरांत थंयचे पुलीस शिपाय ती बस कितले वरांचेर सुटली हाची म्हायती वास्को बस स्टॅण्डा वेल्या पुलिसांक दिताले. ती बस पंदरा मिणटांनी पावूंक जाय अशें वेळेचें बंधन घाल्लें. ताका लागून बशी वेळार सुटूंक लागल्यो आनी वेळार पावूंक लागल्यो. जेणे करून प्रवाशांची गैरसोय पयस जाल्ली. ताका लागून त्या काळांतले नागरीक अजून लेगीत सलीम शेख हांची याद काडटात.
अशीच गजाल वास्को सप्ता काळांत येवपी फर्निचर विक्रेत्यांची. हे विक्रेते टीबी कुन्हा, वास्को न्यायालया मुखा वेलें फुटपाथ तशेंच हेर कडेन आपलो वेवसाय करताले. ताका लागून नागरिकांक फर्निचर खरेदी करपा खातीर हांगा थंय धांवचें पडटालें. ह्या प्रकरणाची दखल घेवन तेन्नाचे येरादारी पुलीस उपनिरिक्षक सलीम शेख हांणी स्वातंत्र्य पथा वेल्या एमपीटी इन्स्टिट्यूट लागसारच्या दोनूय वटानच्या फुटपाथार सगल्या फर्निचर विक्रेत्यांची वेवस्था करपाचो निर्णय घेतलो. त्या वेळार तांकां विरोध जाल्लो. पूण तांणी समजूत काडिल्ल्यान प्रायोगीक तत्वाचेर बदल स्विकारपाचो निर्णय जाल्लो. तो निर्णय येसस्वी थारिल्ल्यान त्या वर्सां सावन आतां मेरेन ते फर्निचर त्या वाठारांतूच आपलो वेवसाय करतात.
तांणी पुलीस स्टेशनांचेरूय कांय म्हत्वाचीं प्रकरणां जापसालदारकेन हाताळ्ळ्यांत. आतां वास्कोचे उपअधिक्षक पदार आसतनाय तांणी हांगासरलीं कांय संवेदनशील प्रकरणां संयमान हाताळिल्ल्यान कायदो आनी सुवेवस्थेचो प्रस्न निर्माण जाल्लो ना.