उद्येगांक मनीसबळ मेळचें म्हूण अभ्यासक्रमांत योग्य तो बदल करतले : मुख्यमंत्री
भांगरभूंय | प्रतिनिधी
पणजी, प्रतिनिधी : हॉटेल, पर्यटन, फार्मसी सारक्या उद्देगांक कुशळ मनीसबळ मेळचें म्हूण अभ्यासक्रमात योग्य तो बदल जातलो. उद्देगांक मनीसबळ मेळपा सयत सगल्याच तरणाट्याक नोकरी मेळपाची गरज आसा, अशे मुख्यमंत्री डॉ. प्रमोद सावंत हांणी सांगले.
उंचेले शिक्षण संचालनालय, शिक्षा उद्येग संगम हांचे वतीन सांखळी सरकारी म्हाविद्यालयात कॉन्वरज 2024 कार्यावळ जाली. उक्तावणा उपरांत ते उलयताले. राज्यांतले बरेच तरणाटे धावी, बारावी उपरांत पदवी मेरेन शिक्षण घेतात. केंद्रीय लोकसेवा आयोग, गोंय लोकसेवा आयोग हे सारख्या परिक्षांची तांकां कसलीच म्हायती नासता. बारावी जातकीर नोकरे खातीरच्या परीक्षांची तयारी सुरू करपाक जाय. पर्यटन, फ़ार्मसी, शिप बिल्डिंग सारख्या उद्देगांक खुब मनीसबळ लागता. आयुष हॉस्पिटला खातीर राज्यांत पात्र उमेदवार मेळपाक कठीण जाल्यात. विकसित भारत 2047 चें सपन साकार करपाक फिट इंडिया, स्किल इंडिया आनी इनक्लुजीव इंडियाचो नारो प्रधानमंत्री नरेंद्र मोदी हांणी दिला. विद्यार्थ्यांनी पदवी सयत कुशळटायेचें प्रशिक्षण घेवचें, अशें आवाहन मुख्यमंत्री डॉ. सावंत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
