भांगरभूंय | प्रतिनिधी
पणजी: उद्देग खातें आनी गुंतवणूक प्रोत्साहन मंडळ (आयपीबी) हांणी मेळून फाटल्या साडेचार वर्सांत वट्ट 14,625 प्रकल्पांक मान्यताय दिल्या. तातूंतल्यान 71,391 रोजगार मेळ्ळ्यात अशी म्हायती उद्देग मंत्री मॉवीन गुदिन्हो हांणी आमदार कार्लोस फेरेरा हांणी विधानसभेंत विचारिल्ल्या लेखी प्रस्नाचे जापेंतल्यान दिल्या.
2018 सावन आतां मेरेन उद्देग खात्यान 14,596 प्रकल्पांक, जाल्यार आयपीबीन 29 प्रकल्पांक मंजुरी दिल्या. ह्या काळांत उद्देग खात्यान मंजुरी दिल्ल्या प्रकल्पांतल्यान 67,654 जाणांक रोजगार मेळ्ळा, जाल्यार आयपीबीन मंजूर केल्ल्या प्रकल्पांतल्यान 3,737 जाणांक रोजगार मेळिल्ल्याचें मंत्री गुदिन्हो हांणी जापेंत म्हणलां.
मजगतीं, उद्देग खातें आनी आयपीबीन साडेचार वर्सांत मंजुरी दिल्ल्या सगल्या प्रकल्पाची वळेरी मंत्री गुदिन्हो हांणी जापेंतल्यान सादर केल्या.
पांच वर्सांत 20 हजार कोटींचें प्रकल्प
राज्यांतल्या उद्देगांनी वाड जावची हे खातीर सरकारान ‘गोंय उद्देगीक वाड आनी गुंतवणूक प्रोत्साहन धोरणा’ची अंमलबजावणी केल्या. ह्या धोरणा खाला फुडल्या पांच वर्सांत 20 हजार कोटी गुंतवणुकीच्या प्रकल्पांक मंजुरी दिवपाचे आसात आनी तातूंतल्यान 30 हजार रोजगार निर्मिती जावपाचो अदमास आशिल्ल्याचें मंत्री गुदिन्हो हांणी जापेंत म्हणलां. उद्देग वाडी खातीर जमीन दिवपा सयत हर गरजेची ती सगली मजत गोंय सरकार गुंतवणुकदारांक करीत आशिल्ल्याचेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
