उच्च माध्यमीक शाळांचो जातलो सर्व्हे

भांगरभूंय | प्रतिनिधी

पर्वरी : राज्यांतल्या सगळ्या उच्च माध्यमीक शाळांचो सर्व्हे करतले. कांय शाळांनी सुविधांचो नियाळ करुन विद्यार्थ्यांचो आंकडो वाडयतले, अशें मुख्यमंत्री डॉ. प्रमोद सावंत हांणी सांगलें.
आयज प्रस्न काळांत आमदार संकल्प आमोणकार हांणी केल्ल्या प्रस्नाक मुख्यमंत्र्यान जाप दितना वयलें आस्वासन दिलें.
आमदार आमोणकार हांणी मुरगांवां उच्च माध्यमीक शाळांचो आंकडो उणो आशिल्ल्यान विद्यार्थ्यांक 10 किलोमिटरा परस फुडें वचून हेर मतदारसंघांतल्या शाळांनी प्रवेश घेवचो पडटा. ताका लागून ह्या मतदारसंघांत आशिल्ल्या मुळाव्या शाळांनी उच्च माध्यमीक शाळो सुरू करपाची परवानगी दितले, असो प्रस्न तांणी केलो.
वास्को मतदारसंघांत अनुदानीत 7, सरकारी 9 आनी अनुदाना विणें 1 अश्यो 17 उच्च माध्यमीक शाळा आसात. कांय शाळांनी विद्यार्थ्यांचो आंकडो उणो आसा जाल्यार कांय शाळांनी तांकी परस चड आसा. हाचें आमदारांनी कारण सोडून कितेंय उपाय काडचो. माध्यमीक शाळांनी उच्च माध्यमीक शाळो सुरू करच्यो पडल्यार सुविधायो उबारच्यो पडटल्यो. हे विशीं सगळ्या शिक्षण संचालकांक सगळ्या विद्यालयांचो सर्व्हे करपाची सुचवणी करतले. अहवाल मेळ्ळ्या उपरांत फुडें उपाय करप सुरू जातलें, अशें मुख्यमंत्र्यान ह्या वेळार म्हणलें.

आतां आयटीआयक म्हत्व
विद्यार्थ्यांक आतां कला, वाणिज्य आनी विज्ञान फाट्यांतूच प्रवेश घेवपाची गरज ना. सध्या सरकारान राष्ट्रीय शिक्षणीक धोरण 2020 प्रमाण कुशळटाय उदरगतीचेर भर दिल्या. धावे उपरांत विद्यार्थ्याक आयटीआयंत प्रवेश घेवपाक मेळटा. आयटीआय उपरांत तांणी डिप्लोमा करूं येता. हाचो विद्यार्थ्यांक फायदो जातलो, अशें मुख्यमंत्री डॉ. सावंत हांणी म्हणलें.