भांगरभूंय | प्रतिनिधी
सांगें: सांगें मतदारसंघांत उगें ग्रामपंचायत वाठारांतल्या देसायवाड्यार पावस आनी वादळी वाऱ्या सयत झाड पडून घराचें लुकसाण जावपाची घडणूक काल (आयतारा) घडली. जाल्यार नेत्रावळी सावरी वाठारांत आंब्याचें झाड माडार आनी माड घराचेर पडिल्ल्यान घराचें लुकसाण जालें.
उगें-सांगेंच्या देसायवाड्यार संजय देसाय हांच्या घरा कुशीक आशिल्ले आंब्याचें झाड घातक आशिल्ल्याची खूबशे फावटी कागाळी दिवन लेगीत संबंदितांनी आडनदर केल्ल्यान निमाणें घराचेर झाड पडलें. झाड मारतले म्हणून झाडाचेर क्रमांक लेगीत घाल्लो. पूण अर्थीक खर्च चड जायत आशिल्ल्यान आडनदर केल्ल्यान ही दुर्घटणा घडली.
संजय देसाय, राहूल देसाय, भौशीक मांड आनी आनीक दोगांच्या घरांचेर झाड पडिल्ल्यान लुकसाण जालें. सुदैवान जिवीत हानी आनी दुचाकी हातूंतल्यान वाटावल्यो. तरी घराचें लुकसाण जाल्ल्यान ह्या पावसाच्या दिसांनी कठीण परिस्थिती निर्माण जाल्या.
संजना देसाय हांणी सांगलें की झाड घातक आशिल्ल्यान हाचे पयलीं आपणें आपल्या खर्चांतल्यान ल्हान ल्हान खांदे मारिल्ले. पूण उरिल्लें झाड मारपाक थळाव्या प्रशासनान आडनदर केल्ल्यान हो घात निर्माण जालो. आमची अर्थीक परिस्थिती बरी नाशिल्ल्यान आमकां परतून घर उबे करपा खातीर सरकारान मजत करपाची मागणी तांणी केली.
हे घडणुकेचेर उगेंच्यो सरपंच भारती नायक हांणी म्हणलें, घातक झाड मारपा खातीर गरजेचो निधी नाशिल्लो. सरकारान पंचायती खातीर 25 हजार रुपयांचो निधी दिला. पूण ताचे परस झाडां चड आशिल्ल्यान निधी उणो पडत आशिल्ल्याचें तांणी सांगलें.
सावरी नेत्रावळी घडणूक लेगीत तशीच आसून विजयकांत भगत हांच्या घराचेर आंब्याचें झाड आनी माड पडिल्ल्यान लुकसाण सोंसचें पडलें. आपल्याक देड लाख रुपयांचें लुकसाण जाल्ल्याचें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
