इंग्लंडाचो प्रधानमंत्री म्हणून न्हय तर हिंदू म्हणून हाजीर आसां : ऋषी सुनक

भांगरभूंय | प्रतिनिधी

लंडन : इंग्लंडाचे प्रधानमंत्री ऋषी सुनक हे रामायण पठणाचे एके कार्यावळीक हाजीर रावले. ह्या वेळार तांणी विधान केलें. ‘आपूण हांगा इंग्लंडाचो प्रधानमंत्री म्हणून न्हय तर एक हिंदू म्हणून हाजीर आसा.’ ते मंगळारा भारतीय स्वातंत्र्य दिसा निमतान इंग्लंडांत केंब्रीज विद्यापीठांत आध्यात्मीक गुरू मोरारी बापू हांणी आयोजीत केल्ले कार्यावळींत उलयताले.
ऋषी हांणी ‘जय सियाराम’ अशें म्हणीत सुरवात केली. तांणी म्हणलें, भारतीय स्वातंत्र्य दिनाच्या निमतान केंब्रीज विद्यापीठांत आयोजीत मोरारी बापू हांचे राम कथेक हाजीर रावप आपले खातीर मानाची गजाल. आयज हांव इंग्लंडाचो प्रधानमंत्री म्हणून न्हय तर एक हिंदू म्हणून हाजीर आसा.
भावार्थ म्हजे खातीर सामकी वैयक्तीक गजाल. हीच श्रद्धा म्हाका जिणेंतल्या दरेक परिस्थितींत मार्गदर्शन करता. प्रधानमंत्री जावप हो व्हड मान, पूण तें सोंपें काम न्हय. ह्या पदाचेर आसतना खूबशे कठीण निर्णय घेवचे पडटात. अशे परिस्थितींत म्हज्या भावार्थाक लागून देशाक सगळ्यांत बरें काम करपाक धैर्य आनी बळगें मेळटा अशें ऋषी हांणी सांगलें.
आपले खातीर भगवान राम सदांच प्रेरणा दिवपी. तांचे कडल्यान आपल्याक धाडसान जिणेंतल्या आव्हानांक तोंड दिवपा खातीर, मनिसपणान सरकार चलोवपाक आनी निसुवार्थान काम करपा खातीर प्रेरणा मेळटा अशेंय ऋषी हांणी सांगलें.