आयपीबी नोकर्यां विशीं विरोधकांनी सरकाराक उजरायलें
भांगरभूंय | प्रतिनिधी
पणजी : गुंतवणूक उर्बा म्हामंडळाच्या प्रकल्पांत गोंयकारांक मेळिल्ल्या नोकर्यांच्या आकड्यांचेर विरोधकांनी सरकाराक उजरावन काडलें.
उद्देगमंत्री आनी मुख्यमंत्री जी म्हायती दिता, तातूंत तफावत आशिल्ल्याचो गंभीर आरोप विजय सरदेसाय हांणी केलो. गुंतवणूक उर्बा मंडळान फाटल्या 9 वर्सांत 19 हजार 421 कोटी रूपयांच्या 259 प्रकल्पांक मान्यताय दिल्या. आता मेरेन राज्यांत 2 हजार 762 कोटी म्हळ्यार 14.22 टक्क्यांची गुंतवणुक जाल्या, अशी म्हायती उद्येगमंत्री मॉविन गुदिन्हो हांणी दिली.
गुंतवणुक आनी रोजगाराविशीं दिल्ले म्हायतींत तफावत आशिल्ल्याचें सांगून विरोधकांनी सरकाराक धारेर धरलें. कितल्या गोंयकारांक नोकरी मेळ्ळी, ताचो आंकडो सरकारा कडेन ना. गोंयां भायल्या लोकांक चड नोकर्यो मेळ्ळ्या, असो आरोप विरोधी पक्ष फुडारी युरी आलेमाव हांणी केलो.
2014 ते 2023 ह्या 9 वर्सांत 9421 कोटींच्या 259 प्रकल्पांक मान्यताय मेळ्ळ्या, अशें श्री. गुदिन्हो हांणी सांगलें. गोंयकार कितले कामाक आसा, ताची म्हायती विरोधकांनी मागली. ह्या वेळार मुख्यमंत्री डॉ. सावंत हांकां हस्तक्षेप करचो पडलो. आयपीबी प्रकल्पांत 2899 गोंयकार आनी 4054 बिगर गोंयकारांक नोकरी मेळ्ळ्या, अशें मुख्यमंत्र्यांनी सांगलें. आयपीबी प्रकल्पांत 45 टक्के गोंयकार आसा, अशें श्री. गुदिन्हो हांणी सभाघरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
