भांगरभूंय | प्रतिनिधी
आयज सूर्य, मळबांतली विषुववृत्त (Celestial Equator) आनी क्रांतिवृत्त (Ecliptic) हांच्या संपात बिंदूचेर येतलो. सोप्या उतरांनी सांगपाचें जाल्यार, मळबांत त्यो दोनूय काल्पनीक रेशो ज्या जाग्याचेर एकठांय मेळटात, लागीं- पयस त्याच सुवातेर आमचो सूर्य आसता.
हाचो असोय अर्थ जाता की, धर्तरेच्या भू- मध्यरेशे लागसार रावपी जिवावळींक ह्या दिसांनी दनपारचो सूर्य सारको आपल्या माथ्या वयर आशिल्लो जाणवतलो (स्वताची सांवळी नाच जाता तो खीण). ह्या काळा मजगतीं, धर्तरेच्या उत्तर आनी दक्षीण अशा दोनूय गोलार्धांत सारके प्रमाणांत सुर्यांचे वत मेळटा.
ह्या दिसांनी, सैम आपल्या आंगा वयलें पोरणें पांगरूण काडून नवें वस्त्र चडोवपाचे तयारेंत आसता. धर्तरेच्या उत्तर गोलार्धांत (Northern Hemisphere) थंडेचे दीस लागीं येतात हें सांगपाकर सृश्टीची ती एक खाशेली येवजण.
ग्रेगोरीयन कॅलिंडरा प्रमाण, वर्साक अशें दोनूच दीस येता, जेन्ना सूर्य जुस्त पुर्व दिकेच्यान उदेंता आनी सारको पश्चिमेक मावळटा. आयज तातूंतलोच एक खास दीस. पुरातन काळांत सुर्यांचे सांवळे वयल्यान वेळ वा रुतू संवेदनशील कार्यांची आंखणी लोक करताले. तांकां आयचे सारक्या सैमीक खिणांचो खूब उपेग जातालो. पिळग्यांन- पिळग्यो त्यो याद उरच्यो म्हूण, ते चडशा घडणुकांचे पुरावे फांतरांचेर कोंरातून वा कसल्याय घडगच्च बांदकामाचे रुपांत नोंद करुन दवरताले.
ह्यो घडणूको प्रत्यक्षांत अणभवपाक गोंय धरून संवसारांत जायतीं उदारणां आसात. मडगांवची होली स्पिरीट इगर्ज ही तातूंतलीच एक उत्तम भौशिक वेवस्था. असल्या घडणुकांचो प्रात्यक्ष अणभव कमी आशिल्ल्यान, अचंबीत करपा सारकी एक खास गजाल हे खेपेक लक्षांत आयली. तीं म्हळ्यार फक्त भौशिक सुवातांचेरूच न्हय तर, गोंयांत थोड्या विचारवंतांनी आपल्या घरांनी लेगीत तसले यादगार खीण पळोवपाची तजवीज करुन दवरल्या. शब्दकोश तज्ञ दामोदर घाणेकार सरान सांगिल्ली एक सुवात, स्वताच्या दोळ्यांनी पळोवपाची आतां खूब उमळशीक लागल्या.
– गौतम जल्मी
9764364269
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
