भांगरभूंय | प्रतिनिधी
गौरव बिद्रेक अटक, चवकशे उपरांत दिली कबुली
भांगरभूंय I प्रतिनिधी
पणजी : खांडोळेंच्या सरकारी म्हाविद्यालयांतली शिक्षिका डॉ. गौरी आचारी (37) हिचो गळो अंदून खून करपाची घडणूक घडल्या. तशेंच तिची कूड पणजी- पोरणें गोंय बगल रस्तो कदंब पठाराचेर हाडून झिलींनी उडयली. ह्या प्रकरणांत पोरणें गोंय पुलिसांनी खुनाचो गुन्यांव नोंद करून बीसीसीआयचे आदले फिटनेस प्रशिक्षक तशेंच प्रसिद्ध जीम ट्रेनर गौरव बिद्रे (36, पोरणें गोंय – मूळ सावंतवाडी-महाराष्ट्र) हाका अटक केल्या.
मेळिल्ले म्हायती प्रमाण डॉ. गौरी आचारी बिरेस्तारा 23 जूनाक सदचे प्रमाण म्हाविद्यालयांत गेल्ली. पूण ती परत घरा येवंक ना. म्हूण तिची आवय भारती आचारी हिणें चवकशी करून सगळे कडेन तिचो सोद घेतलो. पूण तिचे विशीं कितेंच खबर मेळूंक ना.
उपरांत तिणें पाेरणें गोंय पुलीस स्टेशनांत वचून वासपूस केली. पुलिसांनी चवकशी केली तेन्ना ती म्हाविद्यालयांतल्यान दनपारां गेल्ल्याची एका सुरक्षा रक्षकान म्हायती दिली. ते प्रमाण तिचे आवयक फोंडें पुलीस स्टेशनांत बेपत्ता आशिल्ल्याची कागाळ करपाक सांगलें. फोंडें पुलिसांनी रातीं उसरां तिची कागाळ दाखल करून घेतली.
मजगतीं, पोरणें गोंय पुलिसांनी शुक्रारा दनपारां तिचें अपहरण जाल्ल्याचो गुन्यांव नोंद करून तपास सुरू केलो. पुलिसांनी बेपत्ता डॉ. गौरी आचारी विशीं घरच्यां कडेन चवकशी केली, तेन्ना तिचो एक मोगी आशिल्ल्याची म्हायती मेळ्ळी. तशेंच ताचे पसून तिणें संबंद तोडिल्ले, तरी लेगीत तो तिका सतायतालो, अशी म्हायती पुलिसांक मेळ्ळी.
पुलिसांनी गौरी आचारी हिचो आदलो मोगी बीसीसीआयचो आदलो फिटनेस प्रशिक्षक तशेंच प्रसिद्ध जीम ट्रेनर गौरव बिद्रे हाका ताब्यांत घेवन ताची खोलायेन चवकशी केली.
तांणी खोर्ली-पोरणें गोंया तिच्या घरा लागसार नेनो मोटारींत तिचो गळो अंदून खून केल्ल्याची कबुली दिली. तशेंच तिची कूड आपले डस्टर मोटारींत घालून उपरांत पणजी-पोरणें गोंयच्या बायपास रस्त्याचेर कदंब पठाराचेर झिलींनी उडयिल्ल्याचें सांगलें.
पुलिसांनी घडणूक सुवातेर वचून पंचनामो करून कूड ताब्यांत घेतली. तशेंच फुडले तपासणे खातीर कूड गोमॅकॉचे मड्यां कुडींत दवरल्या.
दुबावीत गौरव बिद्रे हाचे आड गौरी आचारी हिचो खून केल्ले प्रकरणांत गुन्यांव दाखल करून ताका अटक केल्या. दुबाविताक शेनवारा पणजेच्या पयलो वर्ग न्यायालयांत पुलीस हजर करतले.
ह्या प्रकरणांत उत्तर गोंय पुलीस अधिक्षक शोबीत सक्सेना आनी पुलीस उपअधिक्षक सुदेश नायक हांच्या मार्गदर्शना खाला पुलीस निरिक्षक दिनेश गडेकार हांच्या फुडारपणा खाला पुलीस उपनिरिक्षक सुदिन रेडकार, गौरेश मळीक, विजार धावस्कार आनी हेर पुलीस कर्मचाऱ्यांनी ह्या प्रकरणांचो तपास केलो.
प्रेम प्रकरणांतल्यान केलो खून
डॉ. गौरी आचारी हिचो प्रेम प्रकरणांतल्यान खून जाला. दुबावीत गौरव बिद्रे हाचें आनी तिचें प्रेम प्रकरण आशिल्लें. पूण उपरांत तिणें ताचे पसून फारकत घेवन संबंद तोडिल्ले. अशें आसून लेगीत बिद्रे तिका त्रास दितालो, अशी म्हायती मेळ्ळ्या. निमाणे ताणेंच तिचें अपहरण करून तिचो गळो अंदून खून केलो. हे विशीं पुलीस चवकशे वेळार तांणी कबुली दिली. पुलिसांनी ताका ताब्यांत घेवन अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
