“नशा मुक्त भारत/ घुंवळे वखदां मुक्त भारत” चित्रकला सर्तीक उपाट प्रतिसाद
भांगरभूंय | प्रतिनिधी
भांगरभूंय | खबरां मेज
पणजी : आंतरराष्ट्रीय घुंवळे वखदां आनी बेकायदो तस्करी आड दिसाच्या निमतान गोवा पुलिसांच्या घुंवळे वखदां विरोधी पुलीस स्टेशनान गोंयभरांतल्या शालेय विद्यार्थ्यां खातीर गोंयभरांतल्या शालेय विद्यार्थ्यां खातीर गो. मेस आनी गणपती हॉल, आल्तिनो, पणजी हांगा “नशा मुक्त भारत/घुंवळे वखदां मुक्त भारत” ह्या विशयाचेर चित्रकला सर्त आयोजीत केल्ली.
विद्यार्थ्यां मदीं घुंवळे वखदां आनी व्यसन हांच्या हानीकारक परिणामां विशीं जागृताय निर्माण करप आनी तांच्या सृजनशीलता आनी कलात्मक अभिव्यक्ती वरवीं निरोगी आनी घुंवळे वखदां मुक्त जिणेचो संदेश पातळावपाक प्रोत्साहन दिवप हो हे सर्तीचो हेत आशिल्लो.
हे कार्यावळीक राज्यभरांतल्या विद्यार्थ्यांचो उपाट प्रतिसाद मेळ्ळो. 5वी ते 7वी गटांत वट्ट 237 विद्यार्थ्यांनी वांटो घेतिल्लो, जाल्यार 8वी ते 10वे गटांत 162 विद्यार्थ्यांनी वांटो घेतलो आनी वट्ट 399 विद्यार्थ्यांचो वांटो आशिल्लो.
ड्रग्स आनी हेर प्रकारच्या व्यसनां पसून पयस रावपाचें म्हत्व विद्यार्थ्यांनी दाखयिल्ल्या उमेदीन दिसून आयलें. आपल्या कलाकृतींतल्यान विद्यार्थ्यांनी घुंवळे वखदां मुक्त भारताचो संदेश आनी जिणेंत माहितीपूर्ण आनी निरोगी निवड करपाची गरज प्रभावीपणान उक्तायली. पालक आनी शिक्षकांनी ह्या उपक्रमाची तोखणाय केली आनी ही कार्यावळ येसस्वीपणान घडोवन हाडपा खातीर अमली पदार्थ विरोधी पुलीस स्टेशनान केल्ल्या वेवस्थेची तोखणाय केली. तरणाट्यां मदीं जागृताय पातळावपा खातीर आनी घुंवळे वखदां मुक्त गोंय आनी नशा मुक्त भारत ही संकल्पना घटमूट करपा खातीर गोवा पुलिसांच्या सातत्यान केल्ल्या यत्नांचो हो एक भाग आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
