भांगरभूंय | प्रतिनिधी
पेडणें : मनोहर आंतरराष्ट्रीय विमानतळाच्या ‘अॅन्ट्री पॉयंट’ रस्त्याचे जाल्ले बाबत अवस्थेक लागून वाहन चालकांक बरेच त्रास सोंसचे पडटात. ताका लागून देशी आनी विदेशी पर्यटकांनी तिडक उक्तायल्या.
विमानतळ जानेवारी सावन कार्यरत आसा. ह्या विमानतळाचें काम जी एम आर हे कंपनीक दिलां. ह्या विमानतळाचेर वचपा खातीरच्या रस्त्यार पडिल्लीं बारीक- मोठीं फोंडकुलां कंपनीक दिसना काय, असो प्रस्न प्रवासी उक्तायतात.
विमानतळाचे मुखेल गेटी कडल्यान धा मिटराच्या अंतरा मेरेनच्या रस्त्याक फोंडकुलां पडून रस्त्याची बाबत अवस्था जाल्या. ह्या रस्त्या वयल्यान हजारांनी वाहनां यो-वच करतात. पर्यटकांक हाचो बरोच त्रास सोंसचो पडटा. हो रस्तो करून वर्स लेगीत जावंक ना आनी पयल्याच पावसांत ताका फोंडकुलां पडलीं. तीं पुरोवपाक चेकर टायल्स घालपाचो यत्न केला. आतां तरी तीं पुरोवन रस्तो दुरुस्त करचो अशी मागणी वाहन चालकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
