आतां प्लास्टिक ‘डिपाॅझिट रिटनेबल स्कीम’
भांगरभूंय | प्रतिनिधी
पर्वरी : गोंय प्लास्टिका पसून मुक्त करपाक सरकारान कितें उपाय काडल्यात, असो प्रस्न आमदार वेन्झी व्हिएगास हांणी आयज सभाघरांत मांडलो.
खंयच्याय दुकानांतल्यान जर तुमी प्लास्टिकांतल्या कितेंय विकतें घेतात जशें दूद, चिप्स वा हेर गजाली जाल्यार तें प्लास्टीक तुमकां परत दुकानदाराक दिवचें पडटलें. गोंयांत रोखडोच हो नेम लागू जातलो, अशें पर्यावरणमंत्री नीलेश काब्राल हांणी सोमारा सभाघरांत सांगलें.
‘डिपॉजिट रिटनेबल स्कीम’ सध्या गोंयांतूय लागू करपाची तयारी सुरू आसा. ताका लागून ज्यो कंपनी आपल्या उत्पादनां खातीर सिंगल यूज प्लास्टिकाचो वापर करतात, तांकां कांय रक्कम पयलींच डिपॉजीट म्हणून भरची पडटली. उपरांत व्हेल्लें प्लास्टीक परत हाडून दिल्यार ती रक्कम परत दितले. ही प्रक्रिया नेमान चलतली. जर खंयच्याय गिरायकान दुकानदारा कडल्यान प्लास्टीक आच्छादना सकट ती वस्तू व्हेल्यार ताका ताचे आनीक पयशे भरचे पडटले. तांणी प्लास्टीक परत केल्यार पयशे दिवचे पडचे नात, अशी जाप मंत्री काब्राल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
