भांगरभूंय | प्रतिनिधी
हवामान विभाग आनी कोची विद्यापिठाचो अभ्यास
पणजी, प्रतिनिधी ः गोंयां सयत पुराय अस्तंत दर्यादेग आशिल्ल्या राज्या खातीर हवामान शास्त्रज्ञांनी हुस्को उक्तायला. दाट लोकसंख्या आशिल्ल्या अस्तंत दर्यादेगेर फुडल्या कांय म्हयन्यांत भिरांकूळ चक्रीवादळ येवपाची शक्यताय आसा. कारण, संवसारीक उश्णतायेक लागून दर्याच्या पृश्ठभागाचेर आशिल्ल्या उदकाचें तापमान नेटान वाडत आसा. देखून दर्यादेगे वेल्या हवामाना विशीं म्हायती दिवपाची यंत्रणा सादूर आसप गरजेचें आसा अशी संशोधकांनी सुचोवणी केल्या.
भारत हवामान विभाग (आयएमडी) आनी कोचीनच्या विज्ञान तंत्रज्ञान विद्यापिठाच्या (सीयूएसएटी) वरिश्ठ हवामान शास्त्रज्ञांनी अभ्यास करुन वयलो निश्कर्श काडला. तेच बरोबर सुरक्षे खातीर कितें करपाक जाय हाचे विशीं सुचोवण्योय तांणी आपल्या अहवालांत केल्यात. हो अहवाल ‘नेचर’ ह्या संवसारीक वैज्ञानिक नेमाळ्यांत उजवाडाक आयला.
वयल्या अहवाला उपरांत केंद्रीय भूवैज्ञानिक मंत्रालय आनी यूकेच्या सक्सेस विद्यापिठान स्पश्ट केलां की दर्यादेगेवेले नुस्तेकार, हेर रावपी लोक वा भोंवतणच्या वाठारांत रावपी लोकांनी सैमीक संकश्टां आड झुजपाक तयार रावपाची गरज आसा.
अहवाला प्रमाण, अरबी दर्यादेगेर अचकीत उश्णताय वाडिल्ल्यान उण्या दाबाचे पट्टे तयार जातात. ताका लागून चक्रीवादळ तयार जातात. अशीं वादळां चड करून मार्च ते जून नैऋत्य पावसाळी वारें सुरू जावचे पयलीं आनी उपरांत आनी परतून ऑक्टोबर ते डिसेंबर मेरेन येतात. पूण, हालींच्या वर्सांनी दर्यादेगेच्या उश्णतेंत व्हड प्रमाणांत वाड जाल्ल्यान खर चक्रीवादळां तयार जावंक लागल्यांत अशें ह्या अहवालांत स्पश्ट केलां.
आयएमडीन केंद्रीय सरकाराक सल्लो दिला
वयलो अहवाल मेळ्ळ्या उपरांत केंद्र सरकाराक बेगोबेग उपाय येवजण तयार करपाची विनंती केल्या अशी म्हायती आयएमडीचे महासंचालक डॉ. मृत्यूंजय महापात्रा हांणी दिली. वादळाची शिटकावणी दिवपी यंत्रणा, वादळां उपरांत कितें करचें हाचे विशीं मार्गदर्शक तत्वां आनी लुकसाण जावचें न्हय हे खातीर घेवची जतनाय विशीं केंद्र सरकारान गंभीरतायेन विचार करचो अशें महापात्रान सांगलें.
भिरांकूळ वादळ जावपाचे कारण
संवसारीक उश्णतायेक लागून दर्या खोल वता तसो वेगवेगळ्या पांवड्यार तापमानांत व्हड बदल जावपाक लागल्यात. ताका लागून पृश्ठभागाचेर उण्या दाबाचे पट्टे तयार जावपाक लागल्यात. अशे तरेन केन्ना केन्ना वादळ वा खर चक्रीवादळां तयार जाता. फुडल्या कांय म्हयन्यांत अशें खर चक्रीवादळ येवपाची चड शक्यताय आसा असो निश्कर्श संशोधकांनी अभ्यासा वयल्यान काडला. देखून गोंय सयत पुराय अस्तंत दर्यादेगेवेल्या राज्यां खातीर हें संशोधन भिरांकूळ आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
