भांगरभूंय | प्रतिनिधी
सरपंचान मध्यस्ती करून मिटयलें प्रकरण
केपें: केपें मतदारसंघांतल्या अवेडें-कोठंबी पंचायतीच्या पंच वांगड्यांच्या घरकाराक ग्रामसभे वेळार आरजी समर्थकान मारपेट करपाची घडणूक घडली.
अवेडें-कोठंबी पंचायतीची काल (आयतारा) सकाळीं ग्रामसभा आयोजीत केल्ली. हे सभेक सरपंच, पंच वांगडी हांचे सयत ग्रामस्थ आनी रिव्होल्युशनरी गोवन्स (आरजी) हांचे कार्यकर्तेय हजर आशिल्ले. तेच बरोबर भाजपा पंच वांगड्यांचो घरकारूय हजर आशिल्लो.
सभा निमाण्या पांवड्यार पाविल्ली तेन्ना थळावो आरजी कार्यकर्तो आशिल्ल्या ग्रामस्थान सरपंचा कडेन विनंती करून ‘हांव उलोवं’ अशें म्हणलें. उपरांत पंचायत वांगडी आशिल्ल्याचो घरकार आनी ताचे मदीं मात्सो वाद जालो. पूण हो वाद हाताभायर वचून पंच वांगड्याच्या घरकाराक मारपेट करपा मेरेन पावलो. उपरांत सरपंचान मध्यस्ती करून हें प्रकरण तात्पुरतें सोडयलें.
हे विशीं सरपंच भुपी गांवस देसाय हांकां विचारलें तेन्ना तांणी सांगलें, साद्या कारणा वयल्यान वाद जावन मारपेट जाली. हांवें मध्यस्ती करून हें प्रकरण मिटयलें. पूण अशे तरेचो प्रकार परतून घडत जाल्यार खपोवन घेवचे नात. गरज पडलीच जाल्यार पुलीस बंदोबस्तांत ग्रामसभा घेतले.
हे संबंदी केपेंचे निरिक्षक दीपक पेडणेंकार हांकां विचारलें तेन्ना, हे विशींची कसलीच कागाळ नोंद जावंक नाशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
