भांगरभूंय | प्रतिनिधी
जुलयांत केलो आस्पाव; वास्को, सांवड्डें स्टेशनांचोय आस्पाव
मडगांव: अमृत भारत रेल्वे स्टेशन विकास येवजणे खाला देशांतल्या 508 रेल्वे स्टेशनांचो विकास करतले. हे येवजणेंत पयल्या टप्प्यांत जाहीर जाल्ल्या रेल्वे स्टेशनां मदीं कोंकण रेल्वे मार्गा वयल्या एकाय स्टेशनाचो आस्पाव नाशिल्लो. पूण जुलयांत कोंकण रेल्वे मार्गा वयल्या मडगांव रेल्वे स्टेशनाचो विकास हे येवजणे खाला केला. ते विशींची कागदोपत्री प्रक्रिया आनी हेर कामां सुरू आसून दुसऱ्या टप्प्यांत ह्या स्टेशनाचें काम सुरू जातलें.
अमृत भारत रेल्वे स्टेशन विकास येवजणे खाला देशभरांतल्या 508 रेल्वे स्टेशनांचो 25 हजार कोटी रुपया खर्च करून विकास करतले. प्रधानमंत्री नरेंद्र मोदी हांणी 6 ऑगस्ट दिसा जाल्ले कार्यावळींत ह्या रेल्वे स्टेशनांच्या विकास कामांचें भूंय पुजन केल्लें. भारतीय रेल्वे कडल्यान सगल्या सोयींनी उपेगी अशीं रेल्वे स्टेशनां तयार करपाचेर भर दिला. विमानतळार देंवल्यार जे प्रमाण प्रवाशांक बऱ्यो सुविधा दितात, तेच प्रमाण रेल्वे प्रवाशांकूय स्टेशनार खंयच्याय गजालीची गरज पडल्यार ती उपलब्ध जावची हे खातीर यत्न करतात. सुरवातेक देशांतल्या 1275 रेल्वे स्टेशनांची वळेरी तयार केल्ली. आतां देशांतल्या सुमार 1309 रेल्वे स्टेशनांचें नुतनीकरण आनी विकास करतले.
अमृत भारत येवजणे खाला पयल्या टप्प्यांत 508 रेल्वे स्टेशनांचे रुप बदलपाचे आसात. त्या कामांचें उक्तावण प्रधानमंत्री नरेंद्र मोदी हांणी केलां. ह्या 508 रेल्वे स्टेशनांचे वळेरेंत कोंकण रेल्वे मार्गा वयल्या एकूय रेल्वे स्टेशनाचो आस्पाव ना. मुंबय-गोंय म्हामार्गाचें काम फाटल्या 15 वर्सां सावन सुरू आसा. म्हामार्गाच्या कामांक लागून वाहनां घेवन प्रवास करप घातक थारत आशिल्ल्यान चड करून रेल्वेकूच प्राधान्य दितात. कोंकण रेल्वे मार्गा वयल्या खूबशा स्टेशनांचेर योग्य उंचायेचे फलाट, वत पावसांत उबे रावपा खातीर शेडीचीय वेवस्था ना. कांय स्टेशनांचेर दोन रेल्वे ट्रॅक आसून लेगीत पांय पुलाचो उणाव आसा. ताका लागून कोंकण रेल्वे मार्गा वयल्या एकाय स्टेशनाचो आस्पाव नाशिल्ल्यान रेल्वे प्रवासी आनी नागरिकांनी निरशेणी उक्तायिल्ली.
पयल्या टप्प्यांतल्या 508 स्टेशनां मदीं वास्को, सांवड्डें स्टेशन
कोंकण रेल्वेचे वरिश्ठ जनसंपर्क अधिकारी आनी उपप्रबंधक बबन घाटगे हांणी दिल्ले म्हायती प्रमाण, अमृत भारत येवजणे खाला मडगांव ह्या एका रेल्वे स्टेशनाचो आस्पाव केला. ते विशीं जुलय म्हयन्यांत परिपत्रक आयलां. पयल्या टप्प्यांतल्या ज्या स्टेशनांचे रुप बदलतले तातूंत दक्षीण पश्चीम रेल्वे विभागांतल्या वास्को आनी सांवड्डें स्टेशनांचो आस्पाव आसा. पूण कोंकण रेल्वेंतल्या एकाय स्टेशनाचो आस्पाव नाशिल्लो.
कोंकण रेल्वे कडल्यान 15 नांवांचीं आशिल्ली शिफारस
अमृत भारत येवजणे खाला भारतांतल्या विवीध राज्यांतल्या रेल्वे स्टेशनांचो विकास आनी नुतनीकरणाचीं कामां हातांत घेतले. हे येवजणेचे सुरवातेक 1275 रेल्वे स्टेशनांची वळेरी तयार केल्ली. कोंकण रेल्वेन सुमार 15 रेल्वे स्टेशनांचीं नांवां धाडिल्लीं. पूण तातूंतल्या एकाय स्टेशनाचें काम पयल्या टप्प्यांत ना. पूण दक्षीण पश्चीम रेल्वेच्या वास्को आनी सांवड्डें स्टेशनांचीं नांवां पयले वळेरेंत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
