भांगरभूंय | प्रतिनिधी
वास्कोंतलें शिवानी-जयदेवी मरण प्रकरण
वास्को: शिवानी राजवत (26) आनी तिची आवय जयदेवी चौहान (50) हांच्या मरण प्रकरणांत अनुराग सिंग राजवत हाका वास्को पुलिसांनी अटक केल्या आनी ताचे पुलीस कोठयेंत वाड केल्या. दुबावितान दक्षीण गोंय जिल्हो न्यायालयांत जामिना खातीर अर्ज केला आनी ताचेर 17 जानेवारीक निवाडो जातलो.
हुंड्या खातीर अनुराग सिंगान नियोजनबद्द रितीन आनी हेतुपुरस्सर आपली घरकान्न शिवानी आनी सासुमांय जयदेवी हांचो खून केल्ल्याचो ठपको ताचेर दवरला. जाल्यार अनुराग सिंगाचे आवयकूय आरोपी केल्या.
18 नोव्हेंबर 2024 दिसा सकाळीं गॅसीचो भडको उडलो आनी शिवानी आनी तिची आवय जयदेवी ह्यो दोगूय हुलपून तांकां जाग्यारूच मरण आयिल्लें. पयलीं हें प्रकरण सिलिंडर गॅस गळटीचें अशें दिसतालें. पूण चवकशी केले उपरांत ह्या प्रकरणान वेगळेंच मोडण घेतलें. शिवानीच्या लग्नाक सात वर्सां पुराय जावचे पयलींच तिका मरण आयिल्ल्यान कायद्या प्रमाण ह्या मरणाची चवकशी मुरगांवचे विभागीय न्यायदंडाधिकारी भगवंत करमली हांणी करून चवकशे उपरांत आपलो 90 पानांचो अहवाल वास्को पुलिसांक 21 डिसेंबराक दिल्लो.
उपरांत शिवानी राजवत हिच्या मरण प्रकरणांत वास्को पुलिसांनी अनुराग सिंग राजवत हाचे आड 23 डिसेंबराक हुंडाबळी खाला गुन्यांव नोंद केल्लो. पयलीं असैमीक मरण म्हूण प्रकरण दाखल केल्लें. पूण चवकशे उपरांत अनुराग सिंग हाचे आड खुनाचो गुन्यांव नोंद करून अटक केली. भयणीच्या हुंड्या खातीर तिचो घरकार, सासुमांय छळ करीत आशिल्ल्याचें शिवानीच्या भावान कागाळींत म्हणिल्लें. उपरांत न्यायदंडाधिकारी करमली हांणी चवकशी सुरू केली. तांणी विवीध साक्षिदारांची जबानी नोंद केल्यो. त्या साक्षिदारांक गॅस गळटी फाटल्यान अनुराग सिंगा विशीं दुबाव उक्तायलो. ताणें 18 नोव्हेंबराक गॅस गळटीन उज्याचो भडको उडचो हे खातीर हेतुपुरस्सर एलपीजी गॅस सिलिंडराचो नॉब चालूच दवरिल्लो. उपरांत तो सकाळ फुडेंच खरेदी करपा खातीर घरा भायर सरिल्लो. गॅस गळटी जावन कुडींत गॅस जमा जाले उपरांत थंय भडको उडून तातूंत शिवानी आनी जयदेवी हीं दोगांय हुलपून तांकां जाग्यारूच मरण आयिल्लें. ह्या प्रकरणांत वास्कोचे पुलीस उपअधिक्षक सलीम शेख हांच्या मार्गदर्शना खाला निरिक्षक कपील नायक तपास करतात.
पुलिसांनी चवकशी सुरू केले उपरांत अनुराग हाका जबाबा खातीर सेगीत आपोवन लेगीत योग्य सहकार्य मेळूंक नाशिल्ल्यान ताका अटक केली. अटके उपरांत दुबावीत अनुरागान दक्षीण गोंय जिल्हो न्यायालयांत जामिना खातीर अर्ज दाखल केला. हाचेर सुनावणी जाली तेन्ना सरकारी वकिलान म्हणणें सादर करपा खातीर वेळ दिवपाची मागणी केल्ल्यान वेळ दिला.
मजगतीं, सोमारा जाल्ले सुनावणे वेळार अनुरागाच्या मेव्हण्यान ह्या प्रकरणांत हस्तक्षेप याचिका सादर केली आनी न्यायालयान ताका परवानगी दिली. अनुराग हाच्या जामीन अर्जाचेर युक्तीवाद केलो. आतां ह्या प्रकरणाची फुडली सुनावणी 17 वेर दनपारां 2.30 वरांचेर जातली. त्या वेळार अनुराग हाच्या जामीन अर्जाचेर निवाडो दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
