भांगरभूंय | प्रतिनिधी
सोनाली फोगाट हे बायलेक गोंयांत मरण आयलें. सुरवेक तिका काळजाच्या आताकान मरण आयलां म्हूण सांगलें. मागीर खून जालो म्हूण सिद्ध जालें. हें जाता आसतना तिच्या निमण्या खिणांच्यो कांय व्हिडियो फुटेजीस लोकां मुखार आयल्यो. तिणें ड्रग्ज घेतिल्ल्याचें वा तिका तें पियेवपाचे जाल्ले यत्न तातूंत दिश्टी पडले. हे सगळे फांटभुंयेर म्हजे कडेन लेखा खातीर विचारणा जाली. हांव विचारांत पडलों. कितें बरयतलों? ‘ड्रग्ज आनी गोंय’ ह्या विशयाचेर खोलायेन आनी सत्याचें दर्शन घडोवपी लिखाण फकत तीगजाण बरोवपाक शकतात. बाकी सगळ्यांचीं उतरां ‘शब्द बापुडे केवळ वारा’. हें खरें की तांणी खरें उलोवपाचें मनार घेवपाक जाय. आतां हे तीन लोक कोण? (इतली उमळशीक ताणून धरिल्ले खातीर, देव बरें करूं!) एक- ड्रग्ज पॅडलर, दुसरे- पुलीस आनी तिसरे- राजकारणी. हांतून पुलीस आनी राजकारणी सत्य कथन करून आपली मलय वगडावचे नात. पूण, म्हजो खरो भावार्थ ड्रग्ज पॅडलरांचेर आसा. ताचें भितल्ल्यान कोणतरी वाल्याचो वाल्मिकी जातलो आनी खरें उलोवपाक लागतलो. आशा करपाक कितें वता? दुनीया उमीद पे कायम है.
कितली पवित्र ही युती. भौसा भितर तांकां कितलो अभिनय करचो पडटलो न्हय. आता तांच्याच भितर केन्ना केन्ना, घोव बायलां भितर जशीं झगडीं जातात तशीं कोफुसावां जातात. पूण, कायमचो घटस्फोट घेवप हे तांचे संस्कृतींत बसना. एक दोगांक ड्रग्ज घेतना अटक जाल्यार समजुपाचें पुलीस खात्यांतल्या गांवठी सिंघमांक पेपरान आपले फोटे छापपाची वान्सां जाल्या. नाजाल्यार ऑनलायन ट्रांजेक्शन सारकें जायना. एकटो राजकारणी तर, आपलो प्रवास रूम बॉय ते अमक्या हॉटेलाचो मालक अशें हड्डे बडोवन सांगता. पूण हो प्रवास नेमको कसो जालो तें मात सांगना. तें सांगल्यार कितलें बरें जावपाचें. उद्योजक जावपाक आंगान कसली ‘कला’ आसची पडटा हाची जाणविकाय तरण्या पिळगेक जावपाची. तांणी आपली काणी सांगची आनी सरकारी नोकर्यां खातीर भोंवपी तरणाट्यांक गुरूमंत्र दिवचो. अशें केल्ल्यान सगळ्यांची एकाच फावटी भरभराट जातली.
हे जालें ह्या तीन इश्टांचें. जनतेचें कितें? तांकां हें मान्य आसा? निखालस ना. पूण हेवूय तितलेंच खरें की ह्या गजालींचो जावपी त्रास तांणी सोडून दिला. हिंसा, भ्रश्टाचार, शिंदळकी राजकी वेवस्था हांकां समाज नाॅर्मल जायत चल्ला. समाज जिवनाचें हें वास्तव तांणी अटळ सत्य म्हूण मानून घेतलां. हें बदलपाचेंच ना, मागीर ह्या अटळ वास्तव्याक सामकार वतना आपल्याय पदरान कितें तरी पडचें अशें ताका दिसता. हें सगळें दिसचेंच न्हय म्हूण मागीर तो सांस्कृतीक प्रतिकां नाचयता. अध्यात्मान, कथा किर्तन, शिगमो, फेस्त हातून स्वताक गुठालावन घेता. हें सगळें करतना ल्हानपणांत मनोहरराय सरदेसाय हांचे कवितेंतलो ‘सुंदर माझा गोवा’ आतां ‘उडता गोवा’ जाला हाची ताका खंत आसा. पूण, परतीची वाट चलपाची तयारी ना. हें अशेंच आनी अशेंच चालू रावतलें हे तांणे मानून घेतलां. आसूं.
सोनाली फोगाट प्रकरणान म्हजे मुखार जे प्रस्न आयलें ते ड्रग्ज, गोंय हाच्या विशीं नासले. ते प्रस्न मातशे वेगळे.
सोनाली ही भाजपाची लोकसभेची हरयाणाची उमेदवार, स्टार प्रचारक, पूण तिच्या मरणा, न्हय खुना उपरांत तिचोच पक्ष तिका न्याय दिवपाक फुडें आयलो ना? हाका कारण कितें जावं येता? भाजप तर नारी शक्ती, भारतीय संस्कृतायेन स्त्रीक देवता रुपान मानपी विचार परंपरेतलो, मागीर ही सोनालीचे बाबतीन उपेक्षा कित्याक? एक कारण आसूं येता, सोनालीच्या मरणा पयलींचे जे व्हिडीयो लोकां मुखार आयले ते तांकां घडये अडचणीचे आसूं येतात. त्या व्हिडीयों भितर ती क्लबान नाचता. आनी तिचो हो अवतार तिच्या पक्षाक मानवचो ना. कारण तिचो पक्ष संस्कृती रक्षक, निती- अनितीच्या बाबतींत सामको सोवंळो. मागीर तांकां हें कशें परवडपाचें? क्लबांत वचप, इश्टां बरोबर नाचप हें उच्च मध्यमवर्गाची जिणेशैली जावन आसा. ताका बाकिच्यांनी हरकत घेवपाची कारणां नात. ती दरेका पक्षांतल्या वयल्या पांवड्या मदल्या नेत्यां भितर आसा. पूण ती जिणेशैली मान्य करप शक्य ना. हें अशें वागप आमचे पारंपरिक दांभिक वृत्तीक अनुसरून आसा. सगळें भोग भोगप वयल्यान मात विरक्तीचें खोटे- खोटे भाव तोंडार हाडप ही आमची प्रवृत्ती. तातूंतल्यान आमी दुसर्यांक हिणयता, कमी लेखता. आमी विदेशी वस्तू वापरतले, विदेशी लोकां बरोबर आपल्या फायद्या खातीर पयशांचे व्यवहार करतले, पूण त्या व्यक्तीक आमी स्विकारचे नात.
सोनिया गांधी जेन्ना राजकारणांत आयली तेन्ना सामके गलीच्छ भाशेंत तिचेर कांय जाणांनी टिका केली. राजकारणांत टिका सोंसपाकूच जाय, पूण ही टिका वंश, कपडे, संस्कृती आनी उल्लेखूय करपाक जायना अश्या बाबतीन जाताली. थोर संस्कृतायेचे पालनकर्ते हें विसरलेले की ती आमच्या देशाची सून. भारतीय नारीचो प्रातिनिधीक चेहरो आसपी स्मृती इराणी आपल्या भुरगेपणांतले मॉडेलींगाच्या तेंपा वयले फोटो छापपाचें धाडस करची ना. कित्याक? त्या वेळार तिणे कितें गैर केल्लें? निखालस ना. मागीर कितें कारण? आयज तिच्या आक्रस्ताळ्या, राष्ट्रवादी राजकारणाक तिचें त्या वेळा वयले फोटो अडचणीचे आसात. कारण आमी मनशांचे मोल ताच्या विचारा वयल्यान करीना तर कपडे, जल्माचें ठिकाण आनी जाती वयल्यान करतात. आनी ताचोच अभिमान बाळगितात. म्हूण तिच्याच पक्षाक ती अडचणीची थारल्या.
दुसरें कारण, राज्यान भाजपची सत्ता आसा. तेन्ना आपल्याच मनशांक अपशकून कसो करतले? सुशांत सिंह राजपुता वेळार परिस्थिती वेगळी आसली. महाराष्ट्र राज्यांत महाआघाडीचें (शिवसेना, राष्ट्रवादी, काँग्रेस) राज्य आसलें. ताका लागून मनाक मारीत त्यो काणयो रचून खवदळ घालो. हाचो अर्थ आपल्या कार्यकर्त्यांच्या मरणान लेगीत राजकी पक्ष आपलो सुवार्थ पळयता. ही सगळ्यांत वीट हाडपी गजाल.
आतां प्रस्न उरता, आमचो समाज ह्या गजाली कडेन खंयच्या नदरेंतल्यान पळयता? जेन्ना माध्यमांतल्या लोकांक कळ्ळें की ही बायल ड्रग्ज घेताली तेन्ना ह्या गजाली कडेन पळोवपाचो समाजाचो दृश्टीकोणूच बदल्लो. ती ड्रग्ज घेताली जाल्यार निश्चितूच गुन्यांवकारी, पूण कोण तरी ड्रग्ज घेता म्हूण तांकां फटोवन ताचो खून करपाचो अधिकार कोणाक मेळना, हें आमी विसरता. तिच्या जाग्यार कोण तरी दादलो मनीस आसलेलो जाल्यार आमचो दृश्टीकोण कसो आसपाचो? ड्रग्ज घेवप वायट हातूंत दुबाव ना. पूण दादल्यान घेतल्यार तो गुन्हो, पूण बायल मनशेन घेतल्यार ती चारित्र्यहीन थारता, हो खंयचो न्याय? आनी फकत चारित्रहीनूच न्हय तर तिच्या कडेन कशेंय वागपाचो, तिचो जीव लेगीत घेवपाचो परवानोच हेरांक अचकीत मेळटा, अशी आमची समजूत आसा व्हय?
15- 16 वर्सां पयलीं गोंयातल्या एका चलयेचेर ताच्याच कांय इश्टांनी आनी कॉलेज कँटिनांतल्या कामगारांनी अत्याचार केलो. त्या पिडीत चलयेक सिगरेटींत घुंवळी वखद घालून ताका ओडपाक दिलें. ही गजाल जेन्ना लोकां मुखार आयली तेन्ना प्रतिक्रीया अशीच आशिल्ली, ‘सिगरेट ओडपी चलयेचें चारित्र्य कितें आसतलें हें आमकां खबर आसा.’ म्हळ्यार तिणें सिगरेट ओडली आनी आपल्याचेर अन्याय करपाची मान्यताय दिवन उडयली आनी त्या अत्याचारी लोकांनी आपलें कर्तव्यच पुराय केलें अशें आमकां म्हणपाचें आसा कांय कितें?
कांय वर्सां फाटीं निर्भया प्रकरणान आरोपी आनी गुन्यांवकारी थारलेले लोकांची आनी तांच्या वकिलाचे मुलाखतीचेर एक डॉक्युमेंटरी आयिल्ली. ताचेर भारत सरकारान बंदी हाडली. पूण तरीय तातूंतलो कंटेंट भायर फुटलो. त्या प्रकरणाले गुन्यांवकार आनी तांच्या वकीलांक जे जालां ते सभावीक अशें दिसतालें. गुन्यावकारींक आपल्या कृत्याचो कसलोच पश्चाताप नासलो. उलट तांका अशें दिसतालें ‘उसरां रातचें आपल्या मित्रा वांगडा फिरपी चलयेचें कितें वेगळें जातलें?’ तिच्या सारक्या ‘संस्कार हीन’ चलयेची ‘नियती’ हीच आसली, अशें तांकां दिसतालें. आयच्या आधुनीक काळांत लेगीत लोक कशे रितीन मध्ययुगीन काळांतल्या मानसिकतेन जगता हाचें हें बेसबरें उदाहरण. चलयांच्या दरेका गजालींचेर, आवडी – निवडी दवरपाक आनी ताच्या वयल्यान ताका जज करपाक चलयो म्हळ्यार सार्वजनीक मालमत्ता न्हय, हें आमकां अजून कळूंक ना.
हे सगळें पळयले उपरांत शेवटाक आमी त्याच सर्वमान्य निश्कर्शा मेरेन पावता. तो निश्कर्श म्हळ्यार चली वा बायल मनीस कपडे मोटवे, उत्तेजक घालता म्हूण बायलांचेर अत्याचार जातात, देखून बायल मनशांनी मर्यादा, लज सांबाळून जगप. म्हळ्यार जाचेर अत्याचार जाता तोच गुन्यांवकार.
समाज कितलोय प्रगत जावं, गुन्यांवकारी विकृतीन भरिल्ले लोक आसतलेच. कायदे कितलेय कडक केले तरी गुन्यांव जायत रावतले हेंवूय तितलेंच खरें. पूण जेन्ना समाजमन पिडीत मनश्यां बरोबर रावंनासतना मुकपणान अत्याचारी प्रवृत्तीच्या फाटल्यान वता तेन्ना स्वातंत्र्य, न्याय ही मुल्यां आपल्या समाजान फावो त्या प्रमाणान रुजूंक ना, अशेंच म्हणचें पडटा.
कुलदीप कामत
9823566958
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
