अंजुणें धरणाच्या उदकाचे पातळेंत वाड
भांगरभूंय | प्रतिनिधी
उदक सोडटले, लोकांक सावध रावपाची शिटकावणी
दिवचल: फाटल्या 20 जून मेरेन पुरायेन रिकामें जाल्ल्या अंजूणें धरणाचे उदकाचे पातळेंत सेगीत पावस पडिल्ल्यान वाड जाल्या. आयज ह्या धरणाच्या उदकाची पातळी 88. 47 मिटर मेरेन पावल्या. उदकाची पातळी नव्वद मिटर मेरेन पावतकच धरणांतल्यान सोडटले. हे विशीं कार्यकारी अभियंत्यान नोटीस जारी करून आशिकुशीच्या पंचायतींक, संबंदीत खात्यांक सावध केलां.
उदक सोडपाचें आशिल्ल्यान कष्टी आनी वाळवंटी न्हंयांच्या वाठारांतल्या लोकांनी न्हंयेचे देगेर वतना जतनाय घेवची. केरी, कारापूर, सर्वण, मोर्लें आनी हेर वाठारांतल्या पंचायतींक खबरदारी घेवची अशें कळयलां.
धरणाच्या वाठारांत आतां मेरेन 2603. 2 मिमी पावसाची नोंद जाल्या. मंगळारा 88 मिमी पावस झडलो. ह्या धरणाची तांक 93. 26 मीटर आसा. उदकाची पातळी णव्वद मिटराचेर येतांच गेट्स उघडून टप्प्या टप्प्यांनी उदक सोडटले. हे विशीं धरण अधिकार्यांनी सुचवण्यो दिवन उदक सोडपाची तयारी सुरू केल्या. फाटल्या वर्सा परस अंदूं ह्या धरणाचे उदकाचे पातळेंत नेटान वाड जाल्या.
लोकांक सतर्क करपा खातीर जिल्होधिकारी, उपजोल्होधिकारी, मामलेदार आनी संबंधितांक जलसंपदा खात्या वतीन कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
