भांगरभूंय | प्रतिनिधी
दिवचल ः वर्सावळी प्रमाण अंदूंय निमाण्या सोमारा, 22 आॅगस्टाक हरवळेंच्या श्री रुद्रेश्वर देवस्थानांत विंगडविंगड कार्यावळी जातल्यो. फाल्यां, सोमारा मुक्तद्वार महापर्वणी आसतली.
सकाळीं 5.30 वरांचेर देवस्थानाचे अध्यक्ष यशवंत श्रीकांत माडकार हांचे हस्तुकीं सगल्यांत पयलीं श्री रुद्रेश्वर चरणाचेर रूद्राभिशेक जातलो. उपरांत समस्त भाविकांक मुक्तद्वार महापर्वणीचो लाव दनपरां 12 वरां मेरेन घेवंक मेळटलो.
सकाळीं 8 वरांचेर समस्त देवस्थानाचे म्हाजन, भावीक तशेंच लोकांचे आनी देवस्थानाचे वतीन देवस्थानाचे अध्यक्ष यशवंत श्रीकांत माडकार हांचे हस्तुकीं सग्रहमुख विष्णूयाग हवन जातलें. दनपरां 12 वरांचेर लक्ष्मीकांत शाणू वायंगणकार हांचे हस्तुकीं अर्चाशुद्धी जातली. दनपरां 1.30 वरांचेर हावसिंग बोर्ड, हरवळेंचे रहिवासी, सांखळी मतदारसंघाचे आमदार आनी गोंयचे मुख्यमंत्री डाॅ. प्रमोद सावंत आपल्या सांगात्यां वांगडा महाआरतीक उपस्थीत रावतले. तशेंच सांखळी पालिकेचे नगराध्यक्ष राजेश सावळ हांचीय हाजिरी आसतली. उपरांत गाराणें, तीर्थप्रसाद आनी महाप्रसाद जातलो. सांजवेळा 6 ते रातीं 8 वरां मेरेन भजनाची कार्यावळ जातली. रातीं 8 वरांचेर टाळ आनी मृदंगाच्या गजरांत पालखी मिरवणूक जातली. स. पुंडलीक चोडणकार हांच्या कुटुंबाचे वतीन पालखी उत्सव मनयतले. तशेंच नारायण वासुदेव मांद्रेंकार आनी परिवार, मळा, पणजी हांचे वतीन चवथो श्रावणी सोमार मनयतले. पालखी मिरवणुके उपरांत आरती, तीर्थप्रसाद आनी महाप्रसादान कार्यावळीची सांगता जातली.
भाविकांनी मास्क वापरचें आनी सुरक्षीत अंतर दवरचें तशेंच सॅनिटायजराचो वापर करचो अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
